Aron Jóhannsson, leikmaður Vals, var fyrsti gestur í Íþróttavikunni með Benna Bó sem hóf göngu sína að nýju eftir sumarfrí. Íþróttavikan er á dagskrá á föstudögum á Hringbraut.

Hörður Snævar Jónsson, íþróttastjóri Torgs, var á sínum stað en þeir félagar fóru yfir fréttir vikunnar meðal annars.

Arnar Gunnlaugsson þjálfari Víkings skrifaði undir framlengingu á sínum samning í vikunni en Hörður á von á því að erlend lið banki á dyrnar eftir næsta tímabil.

„Hann klárar þetta og næsta tímabil. Hann er í dauðafæri að verða bikarmeistari þriðja árið í röð. Ég held að Guðjón Þórðarson hafi náð fjórum á sínum ferli. Hann er búinn að gera Víking að stórveldi sem það hafði ekki verið í 30 plús ár. Hann er búinn að vekja risa,“ sagði Hörður.

Arnar er vel tengdur út í hinum stóra fótboltaheimi og átti glæstan feril sem fótboltamaður. „Til að byrja með vil ég nú segja að ég vona að hann nái ekki sínum markmiðum,“ sagði Aron léttur.

„Hann átti frábæran feril og var kannski í of góðum liðum. Ef hann hefði verið í Nörrköping í fimm ár þá væri örugglega búið að bjóða honum starfið þar. En ég er ekki að sjá hvað sé að standa í vegi fyrir Arnari ef hann heldur þessu striki áfram þá verður hann ekki lengi hér heima.“

Hörður benti á að bróðir hans væri umboðsmaður og það séu hæg heimatökin. „Þeir Bjarki og Aggi eru inn í Stellar sem er stór skrifstofa sem hjálpar líka. Svo talar árangurinn sínu máli. Svona fótbolta spila ég og hér eru titlarnir.“