Íslenska karlalandsliðið í körfubolta er í bullandi séns á að tryggja sér sæti á HM þrátt fyrir tap gegn Spánverjum á heimavelli í gærkvöldi. Tap Úkraínu gegn Ítalíu sér til þess að úrslit kvöldsins skipta engu máli í stóra samhenginu. Úrslitin ráðast á sunnudaginn næstkomandi.
Fram undan er ferðalag íslenska landsliðsins til Tíblisi í Georgíu þar sem fram fer lokaleikur liðsins í undankeppni HM gegn heimamönnum í Georgíu.
Fyrir leikinn situr Ísland í 4. sæti L-riðils með 13 stig, stigi á eftir Georgíu sem situr í 3. sæti sem er jafnframt síðasta sætið sem veitir þátttökurétt á HM.
Staðan í riðlinum, auk fyrri viðureignar Íslands og Georgíu sem endaði með þriggja stiga sigri Georgíu, gerir það að verkum að Ísland verður að vinna með fjórum stiga mun eða meira á sunnudaginn til þess að tryggja sér HM sætið.
Í undankeppni HM í körfubolta eru reglurnar þannig að eitt stig fæst fyrir tap og tvö fyrir sigur.
Sigur einn og sér á móti Georgíu með undir fjögurra stiga mun myndi ekki duga íslenska landsliðinu þar sem liðin yrðu þá jöfn að stigum í þriðja sæti en Georgía með betri árangur í innbyrðis viðureignum.
Ísland þarf sigur með fjögurra stiga mun eða meira til þess að ná yfirhöndinni í innbyrðis viðureignum.
Leikur Íslands og Georgíu fer fram á sunnudaginn næstkomandi og hefst klukkan 16:00.
