Kvennaliði Sefloss í knattspyrnu barst í kvöld mikill liðsstyrkur fyrir komandi keppnistímabil en Dagný Brynarsdóttir samdi við félagið um að leika með liðinu næstu tvö árin.

Dagný kemur til Selfoss frá bandaríska atvinnumannaliðinu Portland Thorns sem leikur í NWSL-deildinni. Hún er margreynd landsliðskona og atvinnumaður en hún hefur spilað 178 deildarleiki hér heima og erlendis og skorað í þeim leikjum 49 mörk.

Þá hefur Dagný hefur leikið 85 A-landsleiki og skorað í þeim 25 mörk. Dagný býr á Selfossi og er ekki ókunnug félaginu því hún hefur spilað 37 leiki fyrir Selfoss í öllum keppnum. Hún spilaði síðast með Selfossi í úrvalsdeildinni 2015.

„Það er ótrúlega mikilvægt fyrir okkur að hafa náð að semja við Dagnýju. Við stefnum á að bæta árangur liðsins enn frekar og það er heiður fyrir félagið og þýðingarmikið fyrir samfélagið að fá atvinnumann af þessari stærðargráðu til þess að taka þátt í þessu verkefni.

Við vitum öll hvað Dagný getur og hún mun klárlega hjálpa okkur að komast á næsta stig. Dagný þekkir Selfoss og er frábær félagsmaður og á eftir að gera mikið fyrir okkur bæði innan og utan vallar,“ segir Alfreð Elías Jóhannsson, þjálfari Selfoss.