Rússneski fimleikmaðurinn Ivan Kuliak hefur verið dæmdur í eins árs keppnisbann fyrir að hafa mætt til leiks á fimleikamót með bókstafinn Z á keppnisbúningi sínum og með því sýnt stuðning við innrás Rússa í Úkraínu. Á sama tíma deildi hann verðlaunapalli með úkraínskum kollega sínum.
Rússland hóf innrás sína í Úkraínu undir lok febrúarmánaðar og síðan þá hefur heimsbyggðin fordæmt aðgerðir Rússa, en bókstafurinn Z hefur verið notaður til þess að sýna stuðning við innrásina og Vladimír Pútín, Rússlandsforseta og má sjá merkið á skriðdrekum og öðrum tækjum Rússneska hersins.
Alþjóðafimleikasambandið hóf rannsókn á hegðun Ivans Kuliak í mars síðastliðnum og telur að með hegðun sinni hafi hann brotið nokkrar reglur sem fimleikafólk á alþjóðavísu má ekki fara á svig við.
Þá mun Ivan einnig þurfa að gefa frá sér brons medalíu sem hann fékk á umræddu móti sem og 400 punda verðlaunafé sem hann hlaut fyrir árangurinn. Þá mun hann einnig þurfa að greiða rannsóknarkostnað sem nemur 1600 pundum.
Nokkrum dögum eftir að atvikið átti sér stað lét Kuliak hafa það eftir sér að hann sæji ekki eftir neinu og myndi gera þetta aftur.
