Kasper Hjulmand, landsliðsþjálfari danska landsliðsins í knattspyrnu hefur komið leikmönnum sínum til varnar eftir að Danir féllu úr leik á HM í Katar í gær. Í kjölfarið hafa dönsku landsliðsmennirnir orðið fyrir hræðilegu netníði og fengið til sín afar hatursfull skilaboð frá ósáttum Dönum.
Hjulmand greindi frá því í viðtali að leikmenn sínir hefðu fengið hatursfull skilaboð eftir að danska liðið stóðst ekki væntingar þjóðarinnar og endaði í síðasta sæti í sínum riðli á HM og án sigurs.
,,Leikmennirnir eiga þetta ekki skilið, ykkur er velkomið að beina reiði ykkar að mér, ég get tekist á við þetta og það er mín skylda," sagði Hjulmand í viðtali.
TV2 Sport kafar í málið og birtir skjáskot af sumum af þeim hatursfullu skilaboðum sem dönsku landsliðsmennirnir hafa fengið á samfélagsmiðlum.
,,Brennið í helvíti," og ,,Spilamennska þín lætur mig kasta upp! Ekki koma heim!" eru á meðal þeirra skilaboða sem sjá má meðal annars samfélagsmiðlasíðum Christian Eriksen og Joachim Mæhle, leikmönnum danska landsliðsins.
Danska landsliðið var með þeim fyrstu til þess að tryggja sig inn á Heimsmeistaramótið í Katar eftir að liðið valtaði yfir riðil sinn í undankeppninni. Þá hafði liðið komist í undanúrslit á EM í Englandi í fyrra.
Væntingarnar urðu ekki minni þegar dregið var í riðla á HM þegar kom í ljós að Danir yrðu í riðli með Frakklandi, Túnis og Ástralíu. Leiðin var talin greið upp úr riðlinum með Frökkum en allt kom fyrir ekki.
Danir unnu ekki leik í riðlinum, skoruðu aðeins eitt mark og halda nú heim á leið.
