Forráðamenn Manchester United hljóta að vera guðslifandi fegnir að hafa hætt að láta einhverja aura skipta máli og samþykkt að borga verðið sem Sporting Lisbon vildi fá fyrir portúgalska landsliðsmanninn Bruno Fernandes. Samningaviðræður voru búnar að standa lengi yfir og var ekkert leyndarmál að Bruno var helsta skotmark Solskjær í janúar áður en United gaf eftir. Eina eftirsjáin gæti verið að hafa ekki náð í Bruno fyrr, eftir vandræði liðsins í sóknarleiknum framan af tímabilinu.

United greiddi væna summu fyrir portúgalska landsliðsmanninn sem hefur staðið undir þeim væntingum sem gerðar voru til hans. Með Bruno kom ferskur blær inn í sóknarleik Manchester United sem hefur fengið sjö stig af níu mögulegum í deildinni með sóknartengiliðinn innanborðs. Hann átti stóran þátt í að landa sigri á Watford um helgina með því að brjóta ísinn í fyrri hálfleik og leggja upp þriðja markið í leiknum.

Síðustu ár hefur heimavöllur United, sem oft er kallaður Leikhús draumanna (e. Theater of Dreams), ekki staðið undir nafni en Bruno hefur verið fljótur að fá aðdáendur til að rísa á fætur á ný.

Bruno, sem verður 26 ára síðar á þessu ári, er að leika hjá sínu fimmta félagsliði. Bruno fór átján ára til ítalska félagsins Novara þar sem sóknartengiliðurinn steig fyrstu skref sín í meistaraflokki. Hann lék síðar í þrjú ár með Udinese og eitt ár hjá Sampdoria áður en tilboð barst frá ættlandinu. Sporting vildi fá 23 ára gamlan Bruno aftur til sín. Hann kom eins og stormsveipur inn í lið Sporting og var strax kominn í lykilhlutverk.

Þrátt fyrir að hafa verið hluti af liði Sporting sem varð fyrir árás stuðningsmanna liðsins, hélt Bruno tryggð við félagið. Níu leikmenn fengu samningi sínum rift, margir hverjir landsliðsmenn Portúgals en Bruno hélt tryggð við félagið og átti sitt besta tímabil þegar hann skoraði 32 mörk í öllum keppnum.

Fréttir bárust af áhuga United á Bruno síðasta sumar og heyrðist frá forráðamönnum leikmannsins að hann væri áhugasamur. Viðræðurnar fóru aldrei á flug og varð hann því að bíða fram í janúar. Þrátt fyrir það lét Bruno ekki deigan síga og var frábær með Sporting á fyrri hluta tímabilsins í portúgölsku deildinni áður en skiptin til United komu til.