Sakamál á hendur Árna Birgissyni, fyrrverandi framkvæmdastjóra ÍR verður þingfest í Héraðsdómi Reykjavíkur í dag. Hann er ákærður fyrir fjárdrátt, umboðssvik og peningaþvætti.

Ákæran er í nokkrum liðum en í þeim fyrsta er Árni ákærður fyrir fjárdrátt með því að hafa í starfi sínu dregið sér samtals 3.161.632 krónur af fjármunum félagsins í fimmtán tilvikum á árunum 2018 og 2019.

Það á framkvæmdastjórinn fyrrverandi að hafa gert með greiðslu reikninga í eigin þágu og millifærslum út af bankareikningi félagsins inn á bankareikning sinn.

Í öðrum ákærulið er Árni ákærður fyrir umboðssvik á árinu 2019, með því að hafa misnotað aðstöðu sína sem framkvæmdastjóri ÍR til að skuldbinda félagið, þegar hann notaði kreditkort félagsins í alls 28 skipti í heimildarleysi til kaupa á vörum og þjónustu til eigin nota, og eftir atvikum í þágu annarra fyrir samtals 1.558.919 krónur.

Fjárhæðirnar voru síðar skuldfærðar af bankareikningi félagsins en kreditkortið hafði ákærði fengið frá ÍR vegna starfa sinna sem framkvæmdastjóri félagsins og var honum ætlað að greiða með því tilfallandi útgjöld tengd starfsemi þess. Framangreind notkun kortsins var samkvæmt ákærunni án heimilda og ótengd störfum Árna fyrir félagið.

Þá er hann að lokum ákærður fyrir peningaþvætti með aflað sjálfum sér ávinnings af brotum samkvæmt fyrri ákæruliðunum, samtals 4.120.611 krónur og í kjölfarið geymt eða nýtt ávinninginn í eigin þágu.

Rekinn eftir rannsókn á fjárreiðum félagsins

Aðalstjórn ÍR samþykkti á fundi sínum þann 6. febrúar 2020 að fela Jóhannesi Bjarna Björnssyni, hæstaréttarlögmanni hjá Landslögum, að leggja fram kæru á hendur fyrrverandi framkvæmdastjóra félagsins, vegna ætlaðrar misnotkunar á reikningum og fjármunum félagsins.

Stjórn félagsins hafði í aðdraganda þess stjórnarfundar rannsakað fjárreiður félagsins vegna gruns um misferli. Grunurinn vaknaði í byrjun vetrar og eftir fyrstu skoðun stjórnar félagsins á fjárreiðum framkvæmdastjóra í nóvember 2019 var haldinn fundur með Árna þann 15. nóvember 2019.

Árni lét þegar af störfum án uppsagnarfrests og án frekari réttar til launa. Var jafnframt lokað fyrir aðgang hans að reikningum og bókhaldi félagsins.

„Nánari yfirferð stjórnar yfir reikninga félagsins leiddi til þess að [í ljós kom að] framkvæmdastjóri félagsins hafði á starfstíma sínum frá 1. október 2018 til starfsloka þann 15. nóvember 2019 með óheimilum hætti tekið rúmar 6 milljónir króna af fjármunum félagsins. Í nóvember, desember og janúar greiddi framkvæmdastjórinn til baka þá fjármuni sem teknir voru án heimildar,“ segir í yfirlýsingu aðalstjórnar ÍR sem send var út í byrjun febrúar í fyrra.

„Við yfirferð stjórnarmanna ÍR yfir fjárreiður og meðferð reikninga, kom einnig í ljós að framkvæmdastjórinn virtist hafa notað reikninga félagsins í eigin þágu, þegar hann gegndi öðrum trúnaðarstörfum á vegum ÍR, á tímabilinu 2014 til 2019. Leitað hefur verið skýringa á þessum millifærslum, sem nema röskum tíu milljónum króna og var sú rannsókn sett í hendur lögreglu. Aðalstjórn mun einnig áfram vinna í því að fá skýringar á greiðslum sem fóru af reikningum félagsins eða einstakra deilda til fyrrum framkvæmdastjóra og krefjast endurgreiðslu á þeim fjármunum sem áttu að renna til ÍR,“ segir enn fremur í yfirlýsingunni frá ÍR.