FH og Víkingur Reykja­vík mætast í úr­slita­leiknum á laugar­daginn. Eiður Smári Guð­john­sen er þjálfari FH á meðan Arnór Borg, yngri bróðir hans, er leik­maður Víkings Reykja­vík.

„Ó­neitan­lega er þetta sér­stök staða en ég hef reynt að hugsa lítið út í þetta,“ segir Arnór Guð­john­sen við Frétta­blaðið. „Maður veit nú ekki alveg hvorum megin maður verður en megi betri maðurinn eða betra liðið vinna, eins og sagt er.“

Arnór segir það ó­gjörning að gera upp á milli sona sinna. „Já, maður gerir aldrei upp á milli barna sinna. Ég ætla mér bara að njóta þessarar stundar, sjá tvo syni mína etja kappi hvor við annan. Það verður bara að hafa gaman af þessu, svo sjáum við bara hvernig fer.“

Eiður Smári lifir fyrir fót­boltann

Eiður Smári tók við FH í erfiðri stöðu í júní og reynir nú að bjarga liðinu frá falli en fyrst reynir liðið að næla í bikar­meistara­titilinn.

„Það var alveg ljóst þegar hann tók við FH að verk­efnið yrði gríðar­lega erfitt,“ segir Arnór um stöðu Eiðs Smára hjá FH. „FH-ingarnir höfðu farið mikið niður á við og það var ekkert að fara að stoppa það. Ég held raun­veru­lega að Eiður hafi stappað í sig stálinu og tekið þessa á­kvörðun, að taka við stjórn FH, til þess að koma sér enn betur í hringiðuna í fót­boltanum.

Eiður Smári lifir fyrir fót­boltann, þetta er hans ást­ríða og má segja að það gildi einnig um okkur fjöl­skylduna, alla­vegana strákana. Í­þróttin á hug okkar allan, við missum ekki af neinu.“

Eiður Smári tók við FH í júní
Mynd: FH

Arnór segir það alveg ljóst að FH þurfi að fara í endur­skipu­lagningu. „Alveg sama hvernig þetta fer á yfir­standandi tíma­bili, það hljóta að verða rót­tækar breytingar. Það er þó eitt við FH,“ segir Arnór og bætir við:

„Alveg sama í hvaða stöðu liðið er, þá er alltaf reynt að spila fót­bolta og gerir liðið það á­gæt­lega.

Það vill hins vegar vera þannig hjá liðinu til þessa að þegar komið er á fremsta hluta vallarins lýkur þessum flottu að­gerðum. Þar hverfur trúin á því að gera mark eða mörk.“

Um erfitt tíma­bil sé að ræða hjá fé­laginu. „Það er hins vegar mín sýn á þetta að einn daginn mun fé­lagið taka sig til og rísa upp aftur, þetta er það stórt fé­lag. Það er metnaður þarna, viljinn er mikill en það er mikil­vægt fyrir fé­lagið að gera sér grein fyrir því í hvaða stöðu það er. Fara í gegnum það hvað vantar upp á og hvaða leið er best til þess að rísa upp aftur. Þetta hefur verið stór­veldi í fót­boltanum síðustu 15 til 20 árin.

Þetta fé­lag, eins og ég þekki til þarna, ég get ekki í­myndað mér að það verði unað við stöðu liðsins í dag. Það er hins vegar of­boðs­lega mikil­vægt að for­ráða­menn þess komist að rót vandans, hvað fór í raun og veru úr­skeiðis og hvernig er hægt að fyrir­byggja að slíkt hið sama gerist aftur.

Tíma­bilið gæti hins vegar tekið góða stefnu takist FH að vinna bikar­meistara­titilinn og um leið tryggja sér sæti í Evrópu­keppni á næsta tíma­bili.“

Mikil­vægur leikur fyrir bæði lið

Arnór og Eiður Smári hafa báðir mjög litla reynslu úr ís­lensku bikar­keppninni þar sem þeir fóru báðir snemma út í at­vinnu­mennsku á sínum ferli. Að­spurður hvort um á­kveðna gul­rót sé að ræða fyrir Eið Smára að næla í bikar­meistara­titilinn sem þjálfari svarar Arnór því játandi.

„Það hlýtur að vera og ég er alveg viss um að hann mun gera allt sem í hans valdi stendur til þess að ná í úr­slit á laugar­daginn. Við vitum alveg stöðuna hjá FH í Bestu deildinni og þar af leiðandi getur maður horft á þennan leik og séð að þetta er gríðar­lega mikil­vægur leikur fyrir fé­lagið.

Í raun er um gríðar­lega stóran leik að ræða fyrir bæði fé­lög því Víkingur getur unnið þennan titil þriðja skiptið í röð og staða FH gerir það að verkum að leik­menn þurfa að leggja allt í sölurnar því þarna er Evrópu­sæti í boði.“

Liðin tvö, Víkingur Reykja­vík og FH, eru í gjör­ó­líkri stöðu fyrir leikinn ef horft er til árangursins í Bestu deildinni á tíma­bilinu. Víkingar að berjast við toppinn á meðan FH er í fall­bar­áttu.

Arnór kominn af stað á ný

Barst þá talið að yngsta syni Arnórs, nafna hans Arnóri Borg Guð­john­sen, leik­manni Víkings Reykja­vík. Hann segir son sinn á fínum stað til þess að þróa sinn feril á­fram eftir krefjandi tíma.

„Hann hefur verið gríðar­lega ó­heppinn með meiðsli og verið mikið meiddur. Það hefur verið rosa­legur eltingar­leikur að finna út hvað var raun­veru­lega að plaga hann. Það tók langan tíma að greina það loksins.“

Um nokkurra ára meiðsla­sögu er að ræða hjá Arnóri Borg sem virðist loks hafa tekið enda og er hann farinn að ná að tengja saman mánuði hjá Víkingum.

Arnór Borg Guðjohnsen, leikmaður Víkings Reykjavíkur
Mynd: Víkingur Reykjavík

„Þetta hafði mikil á­hrif á hann and­lega,“ segir Arnór um meiðsla­tíma sonar síns. „Að vita ekki hvað það var sem var í raun og veru að plaga hann. Maður er dá­lítið svekktur og þá hann náttúru­lega sér­stak­lega því það hefði verið hægt að greina þessi meiðsli fyrr. Það voru alls konar rann­sóknir gerðar á honum, mynda­tökur og fleira, en ekkert virtist vera að.

Svo loksins þegar það er farið út í ná­kvæmari greiningar kemur það í ljós hvað var að plaga hann. Það ferli eitt og sér tók ein­hverja fjóra til fimm mánuði sem náttúru­lega setti tíma­bil hans hér heima í mikið upp­nám.

Það þýðir hins vegar ekkert að væla yfir því núna og ég held hann sé bara virki­lega kátur hjá Víkingum og með hausinn við fót­boltann eins og er raunin í þessari fjöl­skyldu.“

Til­hlökkun fyrir leiknum

Arnór segir fjöl­skylduna ætla að fjöl­menna á Laugar­dals­völlinn um helgina og gera sér glaðan dag. Það ríki mikil til­hlökkun fyrir leiknum. Þá sé mikil­vægi leiksins og rígurinn ekki að hafa á­hrif á sam­skipti feðganna.

„Nei, það er sko engin fjar­lægð á milli okkar þessa dagana. Við tölum mikið um þennan úr­slita­leik. Auð­vitað tel ég mig vita að Eið Smára langar mikið í þennan bikar og það sama gildir einnig um yngri soninn. Þetta verður spennandi.“

Þá segir hann engin skot flakka á milli bræðranna þessa dagana. „Nei, alls ekki. Menn gera sér fylli­lega grein fyrir stöðunni og þeir ræða saman á góðum nótum þó svo að þeir séu sitt á hvorum endanum þegar á hólminn er komið. Svona er lífið bara. Menn hittast á víg­vellinum.“