Þýska tennisgoðsögnin Boris Becker hefur verið dæmdur í tveggja og hálfs árs fangelsi af dómstólum í London fyrir að hafa komið eignum undan eftir að hafa verið lýstur gjaldþrota. Frá þessu greinir Reuters.

Becker var fyrr í þessum mánuði sakfelldur í fjórum ákæruliðum þar á meðal fyrir það að hafa ekki upplýst, leynt og fjarlægt mikið magn eigna í kjölfar gjaldþrot.

Hinn 54 ára gamli og sexfaldi risamótsmeistari var einnig fundinn sekur um að hafa millifært peninga á fyrrverandi eiginkonu sína Barböru og fráskilinnar eiginkonu Sharlely eftir gjaldþrot sitt árið 2017.

Becker vann á sínum tíma sem tenniskappi 49 mót, þar af sex risamót og vann sér inn 25 milljónir dala á tennisvellinum. Hann óskaði eftir gjaldþrotaskiptum árið 2017 þegar hann gat ekki greitt af fasteignaláni af húsi í hans eigu á Spáni.

Í dómsmálinu kom fram að Becker hafi reynt að koma undan 950 þúsund pundum sem hann fékk í sinn hlut fyrir sölu á bílaumboði í Þýskalandi og öðrum 350 þúsund pundum sem hann millifærði á vini og fyrrum eiginkonur sínar.

Þá hafi hann farið leynt með fasteign í Þýskalandi sem er verðmetin á 1,8 milljón evra, hlutabréf og peninga sem hann fékk með láni sem var tekið í Liechtenstein.

Hann slapp hinsvegar undan ásökunum um að halda eftir verðlaunagripum sem umsjónaraðili gjaldþrotaskiptanna vildi selja í von um að fá greiðslur upp í skuldir Beckers.