Björgvin Páll Gústavsson, markvörður karlaliðs Vals í handbolta, er ekki vanur því að sitja auðum höndum en auk þess að verja mark Vals tók hann að sér síðastliðið sumar að þjálfa markverði Bergischer HC.

Þar sem Björgvin Páll er búsettur á Íslandi og leikur með Val fer þjálfun hans að mestu leyti í gegnum tölvu og fjarfundarbúnað og aðra nútímatækni.

Björgvin Páll segir í samtali við hanbolta.is að hann hafi hins vegar farið í herbúðir síns gamla félags, hitt markverðina og séð um æfingar þeirra. Þá hafi hann sett upp plan á fundum með þeim.

„Ég fékk fyrirspurn frá mínu gamla félagi í sumar hvort ég vildi taka að mér það að vera þjálfari eða mentor markvarðanna hjá mínu gamla liði. Niðurstaðan varð sú að ég tók þetta að mér og við fundum fína lausn sem við byrjuðum þá að vinna eftir þótt formlega hafi ekki greint frá þessu fyrr en á dögunum,“ sagði Björgvin Páll í samtali við handbolta.is.

„Ég þekki vel til Bergsicher en það eru svipaðar áherslur í leik liðsins og þegar ég var þar á sínum tíma. Dagsdaglega þá er ég samskiptum við markverðina í gegnum tölvuna eða síma. Við förum yfir væntanlega leiki. Þegar þeim er lokið þá förum við yfir málin, frammistöðu þeirra, hvað var vel gert og hvað hafi mátt betur fara. Kryfjum leikina til mergjar.

Einnig set ég upp æfingar og áhersluatriði fyrir viku í einu sem aðstoðarþjálfarinn fylgir síðan eftir. Þá fórum við yfir minn þankagang í þjálfun og hvaða æfingar ég myndi leggja áherslu á,“ segir Björgvin Páll enn fremur.

„Þetta smellpassar við það starf sem ég er í hjá Val þar sem ég er leiðbeina markvörðum félagsins. Um leið þróa ég minn leik áfram og er Sakai til halds og trausts. Þetta styður hvað annað. Um leið er ég kannski að stíga mín fyrstu skref í draumadjobbinu eftir að ferlinum verður lokið. Hvenær sem það verður,“ sagði hann um framhaldið.