Björgvin Páll Gústavsson, landsliðsmarkvörður Íslands í handbolta svarar gagnrýnendum landsliðsins í færslu sem hann birtir á samfélagsmiðlum í kvöld. Hann þvertekur fyrir yfirlýsingar sérfræðinga um að landsliðið sé karakterlaust og segir menn vera gefa allt í landsliðsverkefnin, klæðist landsliðstreyjunni með stolti.
Íslenska landsliðið í handbolta féll úr leik á HM í handbolta í milliriðlum og hefur liðið, og sér í lagi þjálfari þess Guðmundur Guðmundsson, fengið á sig mikla gagnrýni í kjölfarið.
,,Það merkilegasta sem við gerum er að klæðast landsliðsbúningnum og eru menn að gefa allt sem þeir eiga."
,,Úfff... Þá er maður búinn að melta þetta HM í nokkra daga og langar mig aðeins að pússta," skrifar Björgvin Páll í upphafi færslu sinnar í kvöld.
,,Hver prófessorinn stígur nú fram með sínar útskýringar á allt og öllu. Gagnrýni sem oft er sanngjörn og snýr að boltanum en í mörgum tilvikum “skoðanir“ sem standast ekki skoðun..."
Björgvin Páll segir þær fullyrðingar að væntingarnar hafi borið leikmenn landsliðsins ofurliði, að karakterleysi einkenni liðið og að leikmenn séu ekki að leggja sig alla fram ekki standast skoðun.
,,Krítík fyrir að fagna sigrum á slakari andstæðingum, að það taki enginn ábyrgð, leikmenn hafi ekki verið með fókusinn á réttum stað og ég veit ekki hvað. Hvar eru þessar spurningar og skoðanir þegar við stöndum fyrir framan myndavélina eða þegar við hittumst úti á götu?
Til að svara einhverju af þessu þá... tek ég fulla ábyrgð á þessari HM niðurstöðu og er ógeðslega fúll út í sjálfan mig að hafa ekki gert betur. Ef að pressan og væntingarnar hefðu borið okkur ofurliði þá myndi ég halda að upphaf leikja, spennustig o.fl. myndi gefa slíkt til kynna en ekki slæmir kaflar í seinni hluta leikja eða leiks."
Það að halda því fram að liðið sé karakterslaust eða ekki að gefa allt í verkefnið sé eitthvað sem berskjaldar vanþekkingu þess sem kemur með slíkar yfirlýsingar.
,,Það merkilegasta sem við gerum er að klæðast landsliðsbúningnum og eru menn að gefa allt sem þeir eiga. Menn eru að spila í gegnum allskonar vanlíðan, sársauka og tilfinningar. Síðasti leikurinn var erfiður... Tómir af orku en fullir af vilja náðum við að klára það verkefni. Leituðum í orkuna frá fólkinu í stúkunni og gerðum þetta fyrir fólkið sem nennti ennþá að horfa á okkur í sjónvarpinu."
Draumurinn hafi ekki verið að syngja með íslenska stuðningsfólkinu „Ég er kominn heim“ eftir leikinn gegn Brasilíu.
,,En það var samt eitthvað sem ég mun aldrei gleyma. Ef að fólk horfir á síðustu sek. í þeim leik þá sést að þarna er lið sem er að gefa ALLT fram að síðustu sek.
Ég er ótrúlega stoltur að fá að tilheyra þessu liði og elska þessa gaura!Èg tilbúinn að leggja ýmislegt á mig til þess að næsta mót sem hefst eftir 350 daga verði betra. Áfram Ísland!"
