Mikil aðsókn hefur verið í hin fjölmörgu pílufélög sem starfa vítt og breitt um landið. Fyrir þá sem vilja kynna sér íþróttina og allt er við henni kemur geta heimsótt Pílufélag Reykjanesbæjar í dag og kvöld því í tilefni sumardagsins fyrsta ætlar Pílufélag Reykjanesbæjar að opna dyrnar að frábærri aðstöðu félagsins á Ásbrú og er því öllum bæjarbúum á Suðurnesjum boðið í heimsókn í dag frá 14:00 til 17:00.

Í kvöld mun svo fara fram létt pílumót sem sniðið er að nýliðum en öllum er frjálst að taka þátt, hvort sem þeir eru skráðir í félagið eða ekki. Nánari upplýsingar um dagskrá kvöldsins má finna neðar í fréttinni.

Í tilkynningu frá félaginu segir að það verði því sannkölluð fjölskyldustemning í dag en gestum og gangandi verður boðið upp á léttar veitingar og öllum leyft að kasta pílum og kynna sér jafnframt starfsemi félagsins sem á sögu sína að rekja til ársins 1999. Aðstaða félagsins er að Keilisbraut 755 en fyrir þá sem eiga erfitt með að rata þá er húsið beint á móti veitingastaðnum Langbest.

„Þetta verður frábær dagur fyrir alla fjölskylduna. Það er heldur ekkert aldurstakmark þegar það kemur að þessari frábæru íþrótt enda á hún við unga sem aldna," segir Sísí Ingólfsdóttir, formaður Pílufélags Reykjanesbæjar. Þá bætir hún við að í kvöld muni svo fara fram sérstakt nýliðamót sem ekkert kostar að taka þátt í.

Aðeins fyrir 18 ára og eldri

Mótið, sem hefst klukkan 19:30 ef næg þátttaka næst, verður aðeins fyrir 18 ára og eldri. Þú þarft ekki að vera félagsmaður í Pílufélagi Reykjanesbæjar til að taka þátt, mótið er opið öllum og það kostar ekki krónu að taka þátt. Húsið opnar 19:00 og hvetur formaðurinn alla til að koma örlítið fyrr og kasta nokkrum pílum til að hita upp.

„Þeir sem ekki eiga pílur geta fengið þær lánaðar á meðan mótið fer fram. Þá mun félagið sýna frá beinni útsendingu úrvalsdeildarinnar í pílu sem fer fram í Bretlandi. Þar eigast við tíu bestu píluspilarar í heimi,“ segir Sísí.

Húsið opið frá 14:00 til 17:00 fyrir alla fjölskylduna.

Í kvöld opnar húsið 19:00, fyrir átján ára og eldri.

Skemmtilegt nýliðamót sem er opið öllum, endurgjaldslaust.

Pílufélag Reykjanesbæjar er á Keilisbraut 755 eða beint á móti Langbest á Ásbrú.