Landsliðsmaðurinn Birkir Bjarnason staðfestir á Facebook að hann sé óhultur í kjölfar þess að öflugur jarðskjálfti reið yfir suðausturhluta Tyrklands í nótt. Hann er búsettur þar.
Skjálftinn var 7,8 að stærð og fylgdu öflugir eftirskjálftar í kjölfarið. Upptökin voru skammt frá borginni Gaziantep, ekki langt frá landamærum Sýrlands.
Fuat Oktay, varaforseti Tyrklands, sagði á blaðamannafundi nú á áttunda tímanum í morgun að 284 hefðu fundist látnir og rúmlega 2.300 slasast. Þá hafa yfirvöld í Sýrlandi staðfest að minnst 250 séu látnir þar.
Minnst tíu borgir í Tyrklandi urðu fyrir áhrifum skjálftans: Gaziantep, Kahramanmaras, Hatay, Osmaniye, Adiyaman, Malatya, Sanliurfa, Adana, Diyarbakir og Kilis. Þá fannst hann einnig í Líbanon og á Kýpur.
Birkir leikur með Adana Demirspor. Hann lýsir sig þó óhultan á Facebook.
Þjóðarleiðtogar víða um heim hafa vottað yfirvöldum í Tyrklandi og Sýrlandi samúð sína og boðið fram stuðning.
