Íslenski boltinn

Hefðin hvorki rík hjá Blikum né Stjörnunni

Breiðablik sem einu sinni hefur orðið bikarmeistari og Stjarnan sem aldrei hefur lyft bikarnum mætast í úrslitum í bikarkeppni í knattspyrnu karla í kvöld. Fyrirliðar liðanna eru bæði reyndir í bikarkeppni og á öðrum sviðum knattspyrnunnar.

Þjálfararnir og fyrirliðarnir á blaðamannafundi í KSÍ á dögunum. Fréttablaðið/Anton

Blásið verður til bikarúrslitaleiks í knattspyrnu karla klukkan 19.15 í kvöld, en það verður norðanmaðurinn Þóroddur Hjaltalín sem fær það hlutverk að sjá um að allt fari fram samkvæmt settum reglum í leiknum.

Að þessu sinni mætast tvö félög í bikarúrslitum sem eiga sér ekki ríka bikarhefð þrátt fyrir að þau séu í dag bæði fjölmenn og öflug.

Breiðablik státar af einum bikarmeistaratitli sem liðið vann árið 2009 með því að leggja Fram að velli í bikarúrslitum eftir vítaspyrnukeppni.

Þar áður hafði liðið einu sinni farið alla leið í bikarúrslit, en það var árið 1971 þar sem Víkingur hafði betur.

Stjarnan hefur hins vegar farið tvisvar sinnum í bikarúrslit, það er árin 2012 og 2013 og í bæði skiptin hélt liðið súrt af velli með tap á bakinu. 

Í fyrra skiptið eyðilagði KR partíið fyrir Stjörnunni og í það síðara var það Fram sem hafði betur í vítaspyrnukeppni. 

Þrátt fyrir að Stjarnan sem félag státi ekki af ríkri sögu í bikarkeppninni er fyrirliði liðsins, Baldur Sigurðsson, margreyndur á þeim vettvangi. Hann er að fara í sinn sjötta bikarúrslitaleik, en hann varð bikarmeistari með Keflavík árið 2006 og síðan KR árin 2011 og 2012.

„Það er alltaf jafn mikil spenna í undanfara þessa leiks og fyrir mér er þetta meira tilhlökkun en stress þar sem ég veit upp á hár hvað ég er að fara út í. Það er ávallt frábær umgjörð í kringum leikinn og allt umtalið í kringum leikinn magnar spennuna fyrir honum,“ segir Baldur í samtali við Fréttablaðið.

„Nú er líka langt síðan við höfum spilað deildarleik þannig að spennan hefur fengið að magnast enn frekar í okkar herbúðum. Við erum samt með reynslumikla leikmenn í okkar liði þannig að ég hef ekki áhyggjur af því að spennustigið verði of hátt,“ segir Baldur enn fremur.

„Það er líka geggjað að spila þennan leik á laugardegi um kvöld. Það er alltaf einhver aukafiðringur sem fer um mann þegar spilað er í myrkri og flóðljósum og það gefur leiknum aukakrydd. Þetta verður hörkuleikur og snýst bara um gamla góða dagsformið,“ segir Mývetningurinn spenntur.

Gunnleifur Vignir Gunnleifsson, markvörður og fyrirliði Breiðabliks, hefur ekki farið í jafn marga bikarúrslitaleiki og Baldur, en hann var varamarkvörður hjá KR þegar liðið varð bikarmeistari árið 1999 og vann svo titilinn með FH með sigri á KR árið 2010.

Fyrirliðarnir hafa báðir hampað titlinum áður og vilja upplifa það á ný. Fréttablaðið/anton

„Það er langt síðan við spiluðu síðast deildarleik og fyrir vikið höfum við haft langan tíma til þess að undirbúa þennan leik. Við höfum tapað fyrir þeim í báðum deildarleikjunum í sumar þannig að við þurfum að finna hvað við verðum að gera betur að þessu sinni en í þeim leikjum.“

„Þjálfararnir hafa gert vel í undirbúningnum og ég tel okkur vera eins vel undirbúna og nokkur kostur er,“ segir Gunnleifur um undirbúninginn fyrir komandi verkefni.

Hann segir liðið ekki hafa breytt mikið til.

„Rútínan hefur bara verið hefðbundin og það er mér að skapi. Það hefur ekkert verið farið á hótel eða í einhverja einangrun og mér finnst heillavænlegra að hafa þann háttinn á. Ég mun svo bara fara í gegnum mína venjulegu rútínu á leikdegi og nálgast þennan leik eins og hvern annan,“ sagði Gunnleifur og hélt áfram: 

„Ég finn ekki fyrir auknu stressi, enda orðinn nokkuð reyndur í þessum bransa. Þetta verður vonandi skemmtilegur leikur sem endar á skemmtilegan hátt fyrir okkur,“ segir markvörðurinn enn fremur

Athugasemdir

Auglýsing
Auglýsing

Tengdar fréttir

Íslenski boltinn

Höttur og Huginn sameinast

Íslenski boltinn

Valsmenn með pennann á lofti

Íslenski boltinn

Atli verður áfram í Kaplakrika

Auglýsing

Nýjast

Valur fór ansi illa með Hauka

Fínt framan af hjá íslenska liðinu

Nokkrir góðir kaflar dugðu ÍBV til sigurs

Felix tryggði íslenska liðinu jafntefli

Strembið verkefni hjá Selfossi

Helena: Höfum trú á sigri í þessum leik

Auglýsing