Simon Kjær, leik­maður danska lands­liðsins í knatt­spyrnu biðlar til dönsku þjóðarinnar að sína liðinu sama stuðning eftir HM líkt og raunin var fyrir mótið. Danir féllu úr leik á HM í Katar í gær eftir tap gegn Ástralíu. Spila­mennska liðsins var langt undir væntingum og voru lands­liðs­menn látnir heyra það í dönsku pressunni í gær­kvöldi.

Danir voru í riðli með Frökkum, Áströlum og Túnis og voru væntingar gerðar til þess að liðið færi nokkuð auð­veld­lega upp úr riðlinum. Töp gegn Frökkum og Ástralíu sem og jafn­tefli gegn Túnis sáu hins vegar til þess að Danir enduðu í neðsta sæti riðilsins.

Kjær segist vonast til þess að danska þjóðin muni á­fram standa við bakið á lands­liðinu þrátt fyrir að liðið standi í stormi núna. Hann biðlar til þjóðarinnar.

,,Ég vona að þið getið gert greinar­mun á því sem við reynum að ná fram sem lið og sem ein­staklingar. Við erum jafn von­sviknir og þið með niður­stöðuna," sagði Kjær í við­tali í morgun.

Niður­staðan á HM breyti því ekki hverjir leik­menn danska lands­liðsins eru í raun og veru, breytir því ekki hverju þeir vilja á­orka saman sem lið.

,,Við höfum talað um að vinna sigra saman og það hefur ekki breyst."