Axel Bóasson, GK, verður ásamt Birgi Leifi Hafþórssyni, GKG, meðal kylfinga á fyrsta móti Áskorendamótaraðarinnar í golfi í Evrópu sem fer fram í úthverfi Naíróbí, höfuðborg Keníu í næstu viku.

Axel var fyrsti maður inn á biðlista eftir því að komast inn á mótið en hann fékk boð um að koma á mótið og þáði það í gær. Um er að ræða Barclays-mótið og fer það fram á Muthaiga-vellinum um næstu helgi.

Er þetta fyrsta ár Axels á mótaröðinni en hann vann sér inn þátttökurétt þegar hann varð stigameistari á Nordic Tour mótaröðinni á síðasta ári.

Axel fær takmarkaðan keppnisrétt á fyrsta ári sínu á mótaröðinni og þarf því oft að vera á biðlista á meðan Birgir Leifur er með fullan þátttökurétt.