Íslenska A-landsliðið leikur í dag vináttulandsleik við Venesúela en leikurinn fer fram á Motion Invest-leikvanginum í Austurríki. Á þriðjudag á svo liðið verkefni í Þjóðadeild en sigur þar gæti dugað til að vinna riðilinn og komast upp í A-deild.

Endurkoma reyndari leikmanna hefur verið í fréttum frá því að landsliðshópurinn var valinn á föstudag. Arnar Þór Viðarsson, landsliðsþjálfari, valdi Aron Einar Gunnarsson aftur í landsliðshópinn eftir að að kæra vegna kynferðisbrots var felld niður af ríkissaksóknara. Landsliðsmaðurinn fyrrverandi og íþróttafréttamaðurinn, Hörður Magnússon, mun lýsa því sem fyrir augun ber á Viaplay en leikurinn hefst klukkan 16.00. „Þetta er kærkomið verkefni fyrir Arnar að fá þessa tvo leiki í ljósi þess að hann getur valið úr fleiri leikmönnum. Það er algjörlega ljóst að innkoma þessara þremenninga mun styrkja liðið til mikilla muna,“ segir Hörður Magnússon, en Alfreð Finnbogason, Aron Einar og Guðlaugur Victor Pálsson eru mættir aftur í íslenska landsliðshópinn eftir langa fjarveru.

Jóhann Berg Guðmundsson hafði einnig hug á snúa aftur í landsliðið en smávægileg meiðsli komu í veg fyrir það. „Það hefði verið gaman að sjá aðeins fleiri en þessir þrír eru mjög öflugir og koma inn með mikla reynslu. Þessir leikmenn sem hafa verið að stíga sín fyrstu skref fá loksins lærifeður til að hjálpa sér í gegnum þetta. Mér finnst það punkturinn í þessu,“ segir Hörður, en mikil endurnýjun hefur átt sér stað í landsliðinu undir stjórn Arnars Þórs.

„Þetta er það sem hefur vantað fyrir þessa 18-19 ára gömlu leikmenn sem eru sumir ekki alveg tilbúnir. Þessi endurnýjun hefur ekki verið lífræn og komið af öðrum ástæðum. Sumir hverjir hafa verið að fá landsleiki þegar ljóst er að þeir eru ekki tilbúnir í A-landsliðið. Þetta er eins og það er, við höfum enn möguleika á að fara upp í A-deild og þetta flókna ferli, sem eru styrkleikaflokkar fyrir næstu undankeppni. Þetta verkefni er mikilvægara en fólk heldur.“

Fréttablaðið/Eyþór

Arnar of hreinskilinn:

Hörður telur að með endurkomu reyndari leikmanna sé meiri pressa á Arnari Viðarssyni í starfi, hann geti ekki falið sig á bak við það að vera með ungt lið sem þurfi tíma. „Ég hef verið spurður út í þetta með Arnar, frá upphafi hefur verið mjög erfitt að gagnrýna hann. Á þeim forsendum að hann hafði ekki úr öllum spilastokkunum að velja, hendur hans hafa verið bundnar. Það er alveg ljóst að það er ýmislegt sem má gagnrýna í hans framgangi og núna er ekki endalaust verið að fela sig á bak við það að vanti þennan eða hinn.“

Arnar Þór ákvað að velja ekki Albert Guðmundsson, leikmann Genoa, í hópinn. Hann sagði leikmanninn ekki hafa nógu gott hugarfar til að spila fyrir íslenska landsliðið. „Hann er kannski of hreinskilinn stundum, ég hefði kannski látið það vera að einhverju leyti að segja það sem hann sagði. Mér fannst hann svolítið brútal, aðeins of mikið. Ég hefði frekar sagt að Albert væri ekki í myndinni núna en Arnar er hreinskilinn maður. Það ber að virða það, hann var ekki að fara í kringum heitan grautinn þarna,“ segir Hörður um ákvörðun Arnars.

Höddi Magg fer yfir stöðuna.
Fréttablaðið/Stefán

Bjartari tímar á næstu grösum

Hörður telur að með meiri reynslu í leikmannahópi Arnars séu bjartari tímar fram undan. Liðið mun á næsta ári fara inn í undankeppni Evrópumótsins þar sem möguleiki á miða er stór. „Það eru bjartari tímar fram undan, þetta er búið að vera svakalega dapurt og gerist á skömmum tíma. Það eru margir leikmenn sem fara út af ýmsum ástæðum og þetta hefur ekki verið eðlilegt ástand. Ég held að menn hafi kannski vanmetið hversu alvarlegt ástandið hefur verið, við missum nánast heilt byrjunarlið á einu bretti. Fyrir íslenska knattspyrnu vona ég að leiðin sé upp á við, að við séum að stíga frá botninum,“ segir Hörður, sem mun eftir leikinn í kvöld pakka í tösku og halda til Albaníu þar sem hann lýsir leik Albaníu og Íslands beint frá Air Albania-vellinum í Tirana