Handknattleiksdeild Hauka hefur gert þriggja ára samning við Aron Rafn Eðvarðsson.

Aron Rafn kemur til Hauka í sumar en hann er að snúa til baka til félagsins eftir átta ár í atvinnumennsku.

Þessi 32 ára markmaður gengur til liðs við Hauka frá Bietigheim í Þýskalandi.

Aron Rafn hóf að leika með meistaraflokki Hauka árið 2007 og varð Íslandsmeistari með liðinu árin 2008, 2009 og 2010.

Þar að auki varð hann bikarmeistari með Haukaliðinu 2010 og 2012, og einnig deildarmeistari með liðinu 2009, 2010, 2012 og 2013.

Þá lá leiðin út í atvinnumennsku til Svíþjóðar til Eskilstuna Guif sumarið 2013.

Aron Radb lék með Guif í tvö ár en þaðan fór hann til Álaborgar í Danmörku þar sem hann lék í hálft tímabil áður en hann skipti yfir í Bietigheim.

Sumarið 2017 skipti Aron Rafn í ÍBV í eitt tímabili þar sem hann varð Íslanslandsmeistari, deildarmeistari og bikarmeistari vorið 2018 en Aron Rafn var valinn mikivægasti leikmaður lokaúrslitana það tímabilið.

Eftir tímabilið fór Aron Rafn aftur út til Þýskalands þar sem hann samdi við HSV Hamburg þar sem hann lék í eitt og hálft ár þegar hann skipti yfir til Bietigheim á nýjan leik.

Aron Rafn hefur leikið með íslenska landsliðinu frá árinu 2012 og hefur hann farið á fimm stórmót með liðinu, seinast árið 2017 þegar hann lék á HM í Frakklandi. Hann hefur leikið 84 landsleiki og skorað í þeim 6 mörk.

„Ég er spenntur að koma aftur heim í Hauka eftir 8 ára fjarveru. Búið að vera skemmtilegt ferðalag hjá mér og glaður að koma aftur heim á Ásvelli og spila fyrir Hauka,“ segir Aron Rafn um heimkomuna.