Aron Einar Gunnarsson hefur framlengt samning sinn við Al-Arabi í Katar. Hann skrifar undir út næstu leiktíð en í samningnum er möguleiki á að framlengja hann um eitt ár að því loknu.

Hinn 33 ára gamli Aron Einar hefur verið á mála hjá Al-Arabi frá árinu 2019. Hann kom frá Cardiff City eftir að hafa leikið með liðinu í ensku úrvalsdeildinni tímabilið 2018-2019.

Aron á 97 A-landsleiki að baki fyrir Íslands hönd. Hann fór með liðinu á bæði lokakeppni Evrópumótsins árið 2016 og Heimsmeistaramótsins 2018.

Miðjumaðurinn hefur hins vegar ekkert leikið með landsliðinu undanfarið vegna meints kynferðisbrots hans í Kaupmannahöfn árið 2010.