Arnar Gunnlaugsson, þjálfari Víkings, er heilt yfir sáttur með frammistöðu sinna manna í tveggja leikja einvíginu gegn Malmö í undankeppni Meistaradeildar Evrópu. En hetjuleg endurkoma Víkinga í kvöld dugði því miður ekki til.

Liðin gerðu 3-3 jafntefli á Víkingsvelli í kvöld í undankeppni Meistaradeildar Evrópu. Úrslitin þýða að Malmö vinnur einvígi liðanna 6-5 samanlagt og eru því komnir áfram í næstu umferð undankeppni Meistaradeildar Evrópu en Víkingar munu nú reyna fyrir sér í Sambandsdeildinni.

„Fyrir okkar félag voru þetta tveir frábærir leikir. Það er auðvelt að horfa til baka og hugsa 'hvað ef?' en við getum gengið stoltir frá borði hér. Við vorum hugrakkir í dag, við vorum hugrakkir í Malmö. Áður en einvígið byrjaði vildi ég frammistöðu frá liðinu, hvernig við spilum og hugmyndafræðin okkar. Ég fékk það svo sannarlega í báðum leikjum,“ sagði Arnar á blaðamannafundi í Víkinni eftir leik kvöldsins.

Víkingur mun nú taka þátt í undankeppni Sambandsdeildarinnar þar sem einvígi gegn annað hvort Linfield frá Norður-Írlandi eða New Saints frá Wales bíður. Arnar segir að það verði ekkert mál að gíra liðið upp í það einvígi.

„Ég held að það verði auðvelt. Nú vitum við á hvaða stigi við getum keppt. Ég get lofað ykkur því að félögin frá Wales og Norður-Írlandi eru ekki á sama stigi og Malmö. Ég held við eigum góðan möguleika.“

„Við fórum sem minna liðið í þetta einvígi. Við lærum af þessu fyrir næsta einvígi og það verður ekkert mál að halda strákunum á tánum fyrir það næsta,“ segir Arnar Gunnlaugsson, þjálfari Íslands- og bikarmeistara Víkings Reykjavík.