Arnar Pétursson hættir sem þjálfari bikarmeistara ÍBV eftir tímabilið. Það kemur í ljós á næstu dögum hver eftirmaður hans verður.

Arnar hefur þjálfað ÍBV undanfarin þrjú tímabil. Hann stýrði liðinu einnig á árunum 2009-2014. Arnar og Gunnar Magnússon þjálfuðu ÍBV í sameiningu tímabilið 2013-14 þegar liðið varð Íslandsmeistari í fyrsta og eina sinn.

Eyjamenn urðu bikarmeistarar í þriðja sinn eftir sigur á Fram, 27-35, á laugardaginn.

ÍBV vann ÍR, 30-26, í kvöld þrátt fyrir að nokkra lykilmenn hafi vantað í liðið. Eyjamenn sitja í 3. sæti Olís-deildar karla með 30 stig, tveimur stigum á eftir toppliði FH þegar tveimur umferðum er ólokið.