Arnar Davíð Jónsson úr Keilufélagi Reykjavíkur tryggði sér í dag sigur á Evrópumótaröðinni í keilu fyrir árið 2019. Arnar innsiglaði sigurinn á mótaröðinni með því að vinna lokamótið á túrnum í ár, Opna Álaborgar mótið.

Þetta er hans annar sigur á móti í Evrópumótaröðinni í ár og alls hans þriðji á ferlinum. Arnar Davíð flaug beint til Danmerkur eftir frækna för til Kúveit og spilaði sig strax inn í úrslitakeppnina fyrir Álaborgarmótið.

Endaði hann í 25. sæti eftir forkeppnina og vann sig þar með inn í úrslitadaginn sem fram fór nú í dag. Arnar Davíð sótti hratt upp listann í dag og var kominn í efsta sætið fyrir síðasta niðurskurð.

Hann hélt efsta sætinu og lauk síðustu umferðinni með 236,8 í meðaltal en nú er leikið eftir hefðbundnu skorkerfi ólíkt því sem fram fór í Kúveit. Þetta er í fyrsta sinn í íslenskri keilusögu sem Íslendingur sigrar Evrópumótaröðina.