Eygló Ósk Gústafsdóttir úr Fjölni, er sundkona ársins 2019 og Anton Sveinn McKee Sundfélagi Hafnarfjarðar, er sundmaður ársins 2019.

Við valið er tekið mið af FINA stigum úr bestu grein sundfólksins úr báðum brautarlengdum voru vegin saman árangri sundfólksins á Íslandsmeistaramótum í báðum brautarlengdum var metinn miðað við úrslit greina og besti árangur einstaklings (personal best) á IOC, FINA, LEN, GSSE, NSF

Þá eru tekin saman Íslandsmet og alþjóðleg met í báðum brautarlengdum voru metin, staðsetning á heimslista í 12. desember 2019 í báðum brautarlengdum vegin saman, ástundum á mótum og þátttaka og árangur í landsliðsverkefnum voru metin.

Eygló Ósk óðum að finna sitt fyrra form eftir bakmeiðsli

Eygló Ósk er 24 ára sundkona úr Sunddeild Fjölnis. Hún náði bestum árangri íslenskra kvenna í sundi á árinu 2019, samkvæmt útgefnum viðmiðum SSÍ.

Eygló Ósk Gústafsdóttir tók þátt í Smáþjóðaleikunum sem haldnir voru í Svartfjallalandi og vann þar til þriggja gullverðlauna í 50, 100 og 200 metra baksundi. Eygló Ósk náði þar lágmarki á Heimsmeistaramótið í 50 metra laug sem haldið var í Gwangju í Suður-Kóreu í júlí. Þar tók hún þátt í 50 og 100 metra baksundi.

Eygló náði einnig lágmörkum á Norðurlandameistaramótið í Færeyjum og Evrópumeistaramótið í 25 metra laug sem fram fór í Glasgow nú í desember. Hún ákvað að keppa einungis á EM enda voru mótin haldin nánast á sama tíma. Í Glasgow varð Eygló í 24. sæti í 100 metra baksundi, 18. sæti í 200 metra baksundi og 23. sæti í 50 metra baksundi. Að auki var hún hluti íslensku boðsundssveitarinnar sem setti landsmet í 4 x 50 metra skriðsundi á EM.

Eygló hefur að eigin sögn verið að ná sér af bakmeiðslum sem hafa hrjáð hana undanfarin misseri og hefur nú nánast náð fullum bata. Hún mun einbeita sér að því næstu mánuði að ná lágmörkum fyrir Ólympíuleikana sem haldnir verða í Tokyo 2020. Eygló Ósk Gústafsdóttir er ávallt jákvæð í fasi og fús til að miðla sinni reynslu af löngum og farsælun ferli í sundíþróttinni.

Anton kláraði árið með því að setja sjö Íslandsmet

Anton Sveinn er 26 ára sundmaður úr Sundfélagi Hafnarfjarðar. Anton býr nú í Vestur-Virginíuríki þar sem hann stundar æfingar en hann tók sér ársleyfi í vinnu og fluttist þangað frá Boston, til að ná hámarksárangri fyrir Ólympíuleikana í Tokyo 2020. Hann er sundmaður ársins annað árið í röð.

Anton Sveinn náði ótrúlega góðum árangri á árinu 2019. Hann synti á Smáþjóðaleikunum í Svartfjallalandi í maí þar sem hann vann til þriggja gullverðlauna og setti eitt Íslandsmet, á Heimsmeistaramótinu í 50 metra laug í Gwangju í Suður Kóreu í júlí náði hann í milliriðla í 200 metra bringusundi og þar náði hann Ólympíulágmarki og bætti tvö Íslandsmet, í 50 og 100 metra bringusundi.

Þá var komið að Evrópumeistaramótinu í 25 metra laug í Glasgow. Anton setti þar sjö Íslandsmet, eitt norðurlandamet og jafnaði annað, ásamt því setti hann eitt landsmet í boðsundi með Karlaboðsundsveit Íslands. Þá náði hann inn í úrslit í öllum þremur einstaklingsgreinum sínum á mótinu og náði best fjórða sæti. Árangur Antons gerir hann að fimmta hraðasta sundmanni heims í 200 metra bringusundi á árinu 2019.

Anton Sveinn er fyrirmynd í sem og fyrir utan laugina. Hann kemur vel fyrir, hefur sýnt elju við að miðla sinni reynslu til ungs og upprennandi sundfólks og má vera stoltur af sínum afrekum.