Dagný Brynjarsdóttir, landsliðskona í fótbolta, skoraði sigurmark West Ham United þegar liðið lagði Tottenham Hotspur að velli með einu marki gegn engu í ensku úrvalsdeildinni um síðustu helgi. Dagný var svo valin í lið vikunnar fyrir frammistöðu sína í leiknum.

Dagný gekk til liðs við West Ham United í lok janúar síðastliðins en þá var liðið í slæmri stöðu í fallbaráttu ensku úrvalsdeildarinnar en tókst hins vegar að bjarga sér frá falli.

Sigur Hamranna gegn Tottenham Hotspur þýðir að liðið er með tólf stig eftir átta umferðir og er þremur stigum frá sæti sem veitir þátttökurétt í Meistaradeild Evrópu á næstu leiktíð. Einungis fimm stig skilja raunar að liðin sem sitja í þriðja til tíunda sæti deildarinnar.

Landslagið allt annað núna

„Ég vissi það þegar ég kom til West Ham United að planið var að styrkja liðið umtalsvert og það var gert í sumar. Við vorum með fjóra til fimm landsliðsmenn í leikmannahópnum í fyrra en núna er stór hluti hópsins landsliðskonur,“ segir Dagný sem var að skora sitt annað mark í deildinni á yfirstandandi leiktíð í sigrinum gegn Tottenham Hotspur.

„Það fóru frá okkur rúmlega tíu leikmenn eftir síðustu leiktíð og við fengum svipaðan fjölda inn í hópinn í staðinn. Svo vorum við með leikmenn á Ólympíuleikunum þannig að í upphafi tímabilsins var ég að spila með leikmönnum sem ég þekkti lítið sem ekkert.

Við höfum hins vegar náð að stilla saman strengi okkar fljótt og vel og erum í fínni stöðu í deildinni.

Það eru hins vegar þrír leikir sem sitja í okkur en í þeim leikjum þar sem við höfum gert jafntefli þá höfum við tvisvar fengið á okkur jöfnunarmark í uppbótartíma.

Þá gerðum við jafntefli á móti Birmingham sem náði þar í sitt eina stig til þessa í deildinni þar sem þær skoruðu aulamark úr eina færinu sem þeir fengu.Við hefðum viljað vera með fleiri stig en það er gott að vera í kringum sæti sem gefur sæti í Meistaradeildinni og finnast sem liðið eigi aðeins meira inni,“ segir hún.

Nálægt sínu besta formi

Þegar Dagný kom til West Ham United hafði hún verið að glíma við meiðsli í fimm mánuði.

„Það var krefjandi að koma inn í svona sterka deild eftir að hafa verið lengi frá vegna meiðsla. Svo átti ég minn besta leik skömmu eftir að ég kom og þá fékk ég Covid.Það tók langan tíma að vinna upp þrek eftir veikindin og ég byrjaði að spila of snemma. Ég náði hins vegar að harka mér í gegnum það og við sluppum við fall.

Undirbúningstímabilið var svo gott hjá mér og við æfðum mjög vel. Ég er meiðslalaus núna og komin nálægt mínu besta líkamlega formi.

Þá er stemmingin í liðinu mjög góð og samkeppnin í liðinu mikil þannig að ég þarf að vera á tánum og standa mig vel til þess að halda sæti mínu í byrjunarliðinu.Þannig vil ég hafa það og í þess háttar umhverfi fíla ég mig best,“ segir landsliðskonan sem hefur spilað sjö af átta deildarleikjum West Ham United en í sex þeirra hefur hún hún verið í byrjunarliðinu.

Miðvallarleikmaðurinn missti af fyrsta deildarleik tímabilsins vegna höfuðhöggs.

Dagný er á leið í verkefni með íslenska landsliðinu. Íslenska liðið mætir Japan í vináttulandsleik í Hollandi á morgun og svo Kýpur ytra í undankeppni HM 2023 á þriðjudaginn í næstu viku.