Landsliðsframherjinn Alfreð Finnbogason tók þátt í æfingu Augsburg í dag sem eru jákvæð tíðindi fyrir þjálfarateymi íslenska landsliðsins í knattspyrnu fyrir landsleikina sem eru framundan.

Alfreð fór meiddur af velli í 0-4 tapi Augsburg gegn Werder Bremen fyrir mánuði síðan aðeins viku eftir að hafa skorað þrennu í sigri á Mainz.

Á Instagram-síðu Augsburg í dag sást Alfreð á æfingu liðsins fyrir leikinn gegn Hannover um helgina. Augsburg berst fyrir lífi sínu í deildinni þessa dagana.

Íslenska karlalandsliðið hefur leik í undankeppni EM 2020 næsta föstudag þegar Ísland heimsækir Andorra áður en Ísland heldur til Frakklands og mætir ríkjandi heimsmeisturunum.

Erik Hamrén mun tilkynna leikmannahóp sinn á fimmtudaginn og kemur þá í ljós hvort að Alfreð gefur kost á sér í þetta verkefni vegna meiðslanna.