Albert Guðmundsson skoraði eitt í 3-0 sigri AZ Alkmaar á Breda á útivelli þegar hann fékk loksins að spila í hollenska boltanum í kvöld.

Íslenski landsliðsmaðurinn hefur lítið komið við sögu síðustu vikur og var hann aðeins búinn að fá níu mínútur í deildinni síðan í byrjun desember.

Albert kom inná um miðbik seinni hálfleiks og náði að innsigla sigurinn fyrir gestina með marki á lokamínútum leiksins.

Þetta er annað mark hans fyrir AZ Alkmaar eftir að hafa yfirgefið PSV í sumar til að fá að spila reglulega.