Bryan Barberena mun mæta Gunnari Nelson á bardagakvöldi UFC í O2 höllinni á laugardaginn kemur. Bryan stökk inn með skömmum fyrirvara og ætlar að sanna sig á nýjan leik í bardaganum gegn Íslendingnum eftir tap í síðasta bardaga sínum.
„Ég er spenntur, get ekki beðið,“ sagði Bryan í viðtali sem birtist á heimasíðu UFC. „Stemningin í O2 höllinni er alltaf mögnuð, áhorfendurnir geggjaðir. Ég er að fara inn á óvinasvæði, ætla að taka út einn úr þeirra liði. Það er það sem ég geri best.“
Bryan stökk inn fyrir Daniel Rodriguez, sem Gunnar átti upphaflega að mæta, með gömlum fyrirvara. Bandaríkjamaðurinn barðist síðast við Rafael dos Anjos í desember síðastliðnum, þeim bardaga lauk með tapi Bryans.
„Það að hafa fengið bardagann við Gunnar með svona stuttum fyrirvara er bara akkúrat það sem mig vantaði. Þetta er fullkomið tækifæri fyrir mig að sýna að ég er betri bardagamaður en ég náði að sýna í desember.“
Hann hefur fylgst lengi vel með Gunnari og telur að hann muni mæta sterkari til leiks en var raunin í síðasta bardaga Íslendingsins fyrir ári síðan þar sem vannst sigur á Takashi Sato. Fyrir það hafði Gunnar ekki barist í rúm tvö ár.
„Ég þekki það vel að langt líði á milli bardaga. Mér fannst hann líta vel út, hann gerði það sem hann þurfti til þess að vinna. Mér fannst hann spila þetta öruggt en nú þegar að hann hefur komið sér aftur inn í þetta held ég að hann muni mæta æstari til leiks. Ég hef fylgst lengi með Gunnari, hann er frábær bardagamaður en hefur hljótt um sig, heldur sig til hlés.
Ég held að hann muni mæta í betra standi en í síðasta bardaga sínum. Það að hann þurfi að mæta mér með svona skömmum fyrirvara held ég að falli bara vel að hans upphaflega leikplani gegn Daniel Rodriguez en ég tel mig samt vera töluvert öðruvísi bardagamann en hann og því þarf Gunnar að geta aðlagað sig eftir því sem bardaganum vindur fram.“
Bryan ætlar sér að sanna sig á nýjan leik.
„Fólk veit hvað ég kem með að borðinu þegar inn í bardagabúrið er komið. Áhorfendur og UFC vita að ég mun bjóða upp á flugeldasýningu“
