Handahjólreiðamaðurinn Arnar Helgi Lárusson lenti í mótorhjólaslysi í september árið 2002, þá 26 ára gamall, en í því slysi lamaðist hann frá brjósti og niður.

Arnar Helgi lét þó heldur betur ekki deigan síga þrátt fyrir hreyfihömlunina en hann snéri sér fljótlega að íþróttum, fyrst lyftingum, svo hjólastóla-race og nú handahjólreiðum.

Þessa dagana undirbýr Arnar Helgi, sem er formaður SEM samtakanna, en það eru Samtök endurhæfðra mænuskaddaðra, sig undir að hjóla 400 kílómetra á einum sólarhring í lok júní.

Arnar Helgi, í samvinnu við SEM og Íþróttasamband fatlaðra, vill með þessu vekja athygli á því að hreyfihamlaðir geta vel haldið áfram að stunda hreyfingu þrátt fyrir skerðingu á hreyfigetu og að það séu mikil lífsgæði fólgin í því að njóta aðgangs að tækjum og tólum til þess að hreyfa sig.

Þá er Arnar Helgi um leið að biðla til fólks um aðstoð við að fjármagna kaup á fjórum hjólum sem sérhönnuð eru fyrir hreyfihamlaða. Hugmyndin sé að þau geti verið til láns fyrir áhugasama án endurgjalds.

„Undirbúningur fyrir þennan langa hjólatúr gengur mjög vel og ég hef síðustu daga verið að hjóla allt upp í rúma 200 kílómetra í einum legg og er að nálgast 8.000 kílómetra á þessu ári.

Ég hef fulla trú á að ég geti þetta, en um leið er ég meðvitaður um að líkaminn gæti hafnað þessu uppátæki mínu og þá bara fer það svo. Það er allt í góðu,“ segir Arnar Helgi, um stöðu mála í undirbúningnum fyrir tilraun sína.

Ekki mörgum tekist að gera þetta

„Það eru ekki margir sem hafa leikið þetta eftir í heiminum, þannig að þetta er þónokkuð afrek ef mér tekst þetta. Með þessu vil ég vekja athygli á mikilvægi þess fyrir þá sem verða fyrir mænuskaða að stunda áfram hreyfingu, bæði fyrir andlega og líkamlega líðan.

Fólk þarf alls ekki að vera í jafn miklu formi og ég er að gera, það er bara hreyfingin sem skiptir máli. Þetta er hreyfing sem hentar mér þar sem ég er mjög aktífur að eðlisfari. En ég fæ líka mikið út úr því að að hjóla bara í rólegheitum úti í náttúrunni með fjölskyldu og vinum,“ segir hann enn fremur.

Vilja eiga hjól svo fólk geti prófað

„Um leið og ég er að benda á mikilvægi hreyfingar hef ég sett af stað söfnun fyrir kaupum SEM-samtakanna á fjórum sérútbúnum hjólum. Þetta eru hjól sem kosta um 2,5 milljónir og við myndum lána hreyfihömluðu fólki þau endurgjaldslaust til þess að hvetja það til að fara út að hjóla.

Hjólin eru með mismunandi stillingum á erfiðleikastigi og henta því bæði í rólega hjólatúra og svo meira krefjandi hreyfingu.

Ódýrustu hjólin fyrir hreyfihamlaða kosta rúma milljón og það segir sig sjálft að það er ekki farið út í slíkja fjárfestingu fyrir nokkra hjóla­túra í mánuði. Auk þess sem það eru ekki allir aflögufærir um að borga slíka upphæð fyrir afþreyingu sína,“ segir Arnar Helgi.

Um leið og ég er að benda á mikilvægi hreyfingar hef ég sett af stað söfnun fyrir kaupum SEM-samtakanna á fjórum sérútbúnum hjólum. Þetta eru hjól sem kosta um 2,5 milljónir og við myndum lána hreyfihömluðu fólki þau endurgjaldslaust til þess að hvetja það til að fara út að hjóla.

„Ég fékk sjálfur veglega gjöf frá Lions í Njarðvík eftir að ég varð fyrir slysinu, en á þeim tíma hefði ég ekki haft tök á því að borga fyrir slíkt hjól. Ég verð Lions ævinlega þakklátur fyrir þá gjöf, sem hefur verið mér algerlega ómetanleg,“ segir þessi frábæri íþróttamaður.

Hafa hug á að byggja upp aðstöðu

„Stefnan er að hjóla á góðviðrisdegi í lok júní og ég mun byrja austarlega á landinu og vinna mig suður en ég enda á Selfossi þar sem verður tekið á móti mér og við verðum búin að raka saman þeim búnaði sem til er á Íslandi sem nýtist hreyfihömluðum til hreyfingar til að hafa til sýnis.

Ég er mjög spenntur fyrir þessu og vona að fólk taki vel í þetta. Ég og Jóhann gjaldkeri í stjórn SEM höfum sent út nokkuð hundruð tölvupósta og erum að vonast eftir því að fá sem flesta með okkur í lið því það er samfélaginu öllu til góðs að þetta verði að veruleika.

Planið er auk þess að fjárfesta í hjólum og að kaupa einnig kajaka sem dæmi, og annan búnað sem hentar hreyfihömluðum vel til hreyfingar.

Þá er langtímamarkmiðið að byggja upp aðstöðu þar sem hreyfihamlaðir geta komið saman og æft þannig að þeir þurfi ekki að vera hver í sínu horninu í bílskúrnum sínum að æfa það sem þeir vilja æfa,“ segir formaðurinn um framhaldið.

Hægt er að styrkja þetta framtak og leggja SEM-samtökunum lið með því að leggja fjárhæð inn á eftirfarandi reikning:

Kennitala SEM: 510182-0739 - Reikningsnúmer: 0323-26-001323