Umræðan um velmegun bæjarstjóra er á villigötum. Hún á ekki að snúast um það hvað hver og einn þeirra er með í laun. Mín vegna má alveg borga stjórnendum sveitarfélaga rausnarlega. Vandamálið er að þeir eru alltof margir og það þarf að fækka þeim. Það er miklu mikilvægari umræða en eitthvert karp um hundrað þúsund króna bílastyrki til eða frá.

Nú veit ég ekki hvort það teljast einhver ný sannindi, en fjöldi bæjarstjóra helst gjarnan í hendur við fjölda sveitarfélaga. Þau eru 64 talsins á Íslandi. Í landi sem telur 370 þúsund íbúa.

Þegar efsta lag samneyslunnar er svona umfangsmikið og dýrt þá bitnar það á þjónustunni. Það er alveg sama hvernig dæmið er reiknað. Niðurstaðan er alltaf sú sama. við þurfum að þjappa þessum samliggjandi einingum saman og flytja meira súrefni niður á jarðhæðina. Þar sem þjónustan er veitt. Fækka stjórnendum og fjölga kennurum. Borga framlínunni betur.

Umræðan um sameiningu sveitarfélaga er alveg ótrúlega viðkvæm. Sérstaklega hjá þeim sem eru í aðstöðu til að tækla vandamálið.

Um áratugaskeið hafa kjörnir fulltrúar um allt land keppst við að verja fyrirkomulag sem öll gögn sýna að gengur ekki upp.

Það eru til að mynda sjö bæjarstjórar á Vestfjörðum. Einn bæjarstjóri á hverja 1.000 íbúa. Með hátt í tvö hundruð milljónir í laun á ári. Úr sameiginlegum sjóðum Vestfirðinga. Á svæði þar sem fjárhagur hvers einasta sveitarfélags hangir á horriminni og viðkvæmasta þjónustan er skorin við nögl. Þetta nær auðvitað ekki nokkurri átt.

Umræðan um sameiningu sveitarfélaga á Vestfjörðum er vissulega viðkvæm en hún kemst ekki í hálfkvisti við sömu umræðu á suðvesturhorninu.

Eins og það sé eitthvert náttúrulögmál að skipta svæði sem telur færri íbúa en Stoke upp í sex stjórnsýslueiningar.

En aftur. Það er ekkert athugavert við að greiða stjórnendum sveitarfélaga góð laun. Laununum þarf bara að fylgja sú eðlilega krafa að stjórnendur standi undir ábyrgðinni sem fylgir með í kaupunum. Sýni að þeir geti tekið erfiðar ákvarðanir sem skila skynsamlegri rekstri og betri þjónustu. Það er það sem öllum vel launuðum stjórnendum ber að gera.

Mín vegna mega þeir fá ríflegan kaupauka ef þeim tekst að taka aðeins til í þessu höfuðstóra fyrirbæri.