Ég fæ alls konar hugmyndir en hef því miður ekki tíma til að útfæra þær allar. Ef einhvern vantar bissnesshugmynd þá eru hér nokkrar, ég tek 10% af innkomu:

Ég hef verið gríðarlega dugleg að fara í dýragarða í sumarfríinu. Ég er kannski bara rosalega óheppin en við höfum lent í því að slöngur, froskar, gaupur og fleiri spennandi dýr fela sig. Því datt mér í hug dýragarður með eingöngu feludýr. Í rauninni væru afar fá dýr í garðinum, jafnvel engin dýr ef alvöru fúskari tekur þessa hugmynd, bara starfsfólk sem segir: „Æj, já, þessi eyðimerkurmús er næturdýr og sefur á daginn. Já, þessi höggormur er oftast undir steininum þarna aftast.“ Búrin væru risastór og gestum væri sagt að dýrin væru feimin.

Eitt myndi slá í gegn – ceviche-staður með Subway-uppsetningu. Já, lúðu? Kóríander? Chili? Gjössovel. Ferskur fiskur, hröð þjónusta.

Viðskiptamódel ísbílsins er æði. Við þurfum fleiri bílafyrirtæki. Þynnkubíllinn væri bíll með tveimur rúmum þar sem hægt væri að fá saltlausn í æð. Húðflúrsbíll væri mjög sniðugur, myndi slá í gegn á útihátíðum og gæti líka komið í steggjapartíið, stórafmælið og auðvitað brúðkaupið. „Ef þið viljið fá ykkur tattú með #MagnBet22 þá er Tattúbíllinn hér fyrir utan.“ Gæti líka verið smart í jarðarfarir.

Talandi um jarðarfarir: Útfararþjónusta sem sérhæfir sig í partí­jarðarförum. Ég held að eftir nokkur ár verði mikill markaður fyrir öðruvísi jarðarfarir – sambland af minningarpartíi og erfidrykkju – ekki eitthvað „fyrst erum við í þessu húsi og allir eiga að vera stilltir og á eftir er matur sem er búinn að standa og bíða“. Skemmtiatriði, ræður, partí þar sem við njótum augnabliksins.

Þá er ég búin að koma þessum hugmyndum út í kosmósið og nú er bara að bíða.