Stefna ríkisstjórnarinnar um að senda sérfræðiverkefni út á land er strax byrjuð að bera ávöxt. Ekki skrýtið, því allir okkar færustu lögfræðingar eru í Norðvesturkjördæmi þar sem nándin er mikil og allir geta gengið í störf annarra.

Bragi Axelsson hefur náð undraverðum árangri í að gera allt vitlaust hjá Innheimtustofnun Sveitarfélaga á Ísafirði, þaðan sem hann var sendur í leyfi.

Hefur hann nú meiri tíma til að sinna talningarmálum í kjördæminu, ásamt því að selja fasteignir með Inga Tryggvasyni.

Leðurblakan sýknuð

Hefur nú komið í ljós að kófið á ekki uppruna sinn í hóstandi, kínverskri leðurblöku. Var veiran líklega búin til á rannsóknarstofu. Er þetta enn eitt dæmið um veruleika sem er miklu óskemmtilegri en hann ætti að vera.

Í myndum eins og nýjustu Köngulóarmyndinni sem er frumsýnd í dag, þá valda lekar af rannsóknarstofum ofurkröftum.

Eins gaman og það væri að skipta veikindum út fyrir að geta klifrað upp veggi, þá þyrftum við að mæta þeim sem trúa ekki á köngulær, vilja ekki bólusetningu gegn Doc Ock og þá sem krefjast þess að fólk sem þrífur ekki vefinn sinn utan af háum byggingum, verði sett í einangrun.