Bassi Maraj, Patrekur Jaime og Binni Glee tóku pólitískan snúning í Æði-þætti gærkvöldsins.

Áhrifavaldarnir komu að vonum úr óvenjulegri átt í umræðum sem hófust á uppgjöri Bassa við fræga Twitter-snerru hans og fjármálaráðherra en nú liggur fyrir að Bassi var bara í galsa þegar hann „ætlaði aðeins að fokka í“ Bjarna Benediktssyni.

Sjálfsagt má Sjálfstæðisfólk þakka sínum sæla að helsti markhópur þeirra félaga er ekki kominn með kosningarétt þar sem Patrekur Jaime kvað upp þann þunga dóm að Áslaug Arna dómsmálaráðherra ætti að fá sér Chardonnay þar sem hún ætti ekki Pinot Grigio skilið.

Beinagrindur í kjallaranum
Eðalvín flæða víðar þessa dagana og eru til vandræða á Bessastöðum eftir að Sigurður G. Guðjónsson gerði gegnumstreymi áfengis þar tortryggilegt.

Þungi stormsins í kristalnum er slíkur að samkvæmt RÚV var ráðsmaðurinn á Bessastöðum kallaður úr fríi til þess að kanna birgðastöðuna í vínkjallaranum.

Merkilega flókið og viðamikið verkefni ef rétt reynist að vínkjallarinn á Bessastöðum sé í raun bara skápur, eins og Jakob Bjarnar Grétarsson blaðamaður taldi sig hafa heimildir fyrir í Bítinu á Bylgjunni í gærmorgun.