Leitin að hamingjunni, lífsfyllingu eða friðinum er eitt stærsta verkefnið sem við sem manneskjur stöndum frammi fyrir. Hvernig við skilgreinum þetta ástand er síðan jafn ólíkt og við erum mörg. Sjálfur hef ég skilið hamingju þannig að tveir grundvallarþættir þurfi að vera í lagi til að hægt sé að nálgast þetta ástand. Við þurfum í fyrsta lagi að vera ánægð með stöðu mála í lífi okkar, ástarlíf, félagslíf, vinnu, fjármál og helst vera þakklát. Síðan er það hin hliðin sem krefst þess að tilfinningar okkar séu í jafnvægi og að við finnum í sálinni ró.

Mér hefur oft fundist ágætt að sjá leitina að hamingjunni eins og slönguspil, spil sem við flest höfum spilað og gengur út á að komast frá upphafsreit að endastöð með teningakasti. Á leiðinni getur maður lent á stiga sem færir mann upp um reiti eða slöngu sem hendir manni lóðbeint til baka. Þannig held ég að sé ágætt að sjá leitina að lífshamingjunni, maður nær þó sjaldnast endastöð en færist fram með hverju kasti og stundum aftur. Áföll, veikindi, átök og vímuefnaneysla eru ágætis dæmi um slöngur sem senda mann aftur. Fæðing barna, gefandi vinna, heilsa og heilbrigt fjölskyldulíf eru svo dæmi um stiga sem færa okkur upp.

Settu því upp slönguspilið að þinni lífshamingju í höfði þínu. Skoðaðu hvar þú ert í dag og þakkaðu fyrir stigana sem hafa komið þér þangað sem þú ert. Mundu að slöngurnar sem sendu þig aftur kenndu þér að meta það sem þú hefur og hverfulleika þess. Reyndu því að temja þér þakklæti fyrir það sem þú ert og það sem þú hefur. Ef það er ekki staðan er gott að muna að það kemur fljótlega að þér að kasta aftur.