Við Íslendingar höfum átt öflugt íþróttafólk í gegnum tíðina sem náð hefur undraverðum árangri undir fána smáþjóðar. Samkeppnin harðnar stöðugt og ekki er lengur nóg að hafa hæfileika og metnað til að komast í fremstu röð. Fyrsta flokks aðstaða til íþróttaiðkunar skiptir höfuðmáli.

Málefni þjóðarleikvanga hafa verið til umræðu um alllangt skeið. Okkar fremsta afreksfólk og landslið hafa ekki aðgang að æfingaaðstöðu eða mannvirkjum sem uppfylla þær kröfur sem gerðar eru í dag. Núverandi þjóðarleikvangar eru komnir til ára sinna og aðstaðan úrelt. Hætta er á því að heimaleikir íslenskra landsliða, sem nú eru haldnir á undanþágu, geti ekki farið fram hér á landi. Við það verður ekki unað og það er forgangsverkefni að hraða byggingu þjóðarleikvanga í íþróttum.

Eitt af mínum fyrstu verkum sem ráðherra íþróttamála var að skipa stýrihóp um undirbúning uppbyggingar þjóðarleikvanga fyrir innanhússíþróttir, knattspyrnu og frjálsíþróttir. Víðtækt samtal átti sér stað við íþróttahreyfinguna og Reykjavíkurborg og er myndin byrjuð að skýrast. Byrjað verður á þjóðarhöll í innanhússíþróttum en undirbúningur fyrir nýja þjóðarleikvanga í knattspyrnu og frjálsíþróttum heldur áfram samhliða.

Viljayfirlýsing um byggingu nýrrar þjóðarhallar fyrir innanhússíþróttir í samstarfi ríkis og Reykjavíkurborgar var undirrituð 6. maí. Framkvæmdanefnd er falin uppbygging þjóðarhallar í Laugardalnum með metnaðarfullt takmark um verklok 2025. Hún vinnur nú að því að skilgreina mannvirkið, ákvarða rekstrarform og áætla kostnað. Fyrsti fasi verkefnisins er í fullum gangi og samkvæmt áætlun. Við Íslendingar gerum miklar kröfur til íþróttafólks um afrek. Það er eðlilegt að íþróttafólk og hreyfingin öll geri kröfur til stjórnvalda um viðunandi aðstöðu til að hámarka árangur.

Eins vel og Laugardalshöllin hefur þjónað íþróttalífinu er hún barn síns tíma. Með nýrri höll í Laugardalnum verður umgjörð fyrir íþróttastarfið, fjölmiðla og áhorfendur eins og best verður á kosið. Við ætlum að klára verkefnið og sjá til þess að afreksíþróttafólk okkar geti notið aðstöðu á heimsmælikvarða.