Lífið er stöðug þróun og það sem þykir sjálfsagt í dag þykir oft úrelt á morgun. Mín kynslóð miðlaði verðmætum með ávísunum og víxlum sem unga kynslóðin hristir höfuðið yfir, enda rafrænar lausnir þeirra heimur.

Í dag eru um 10% af útgjöldum heimila greidd með reiðufé og ljóst að reiðufé verður áfram notað – enda finnst mörgum gott að eiga nokkra seðla í veskinu til að afgreiða smáinnkaup. Það er hins vegar löngu tímabært að settar verði ríkar hömlur á notkun reiðufjár til að sporna við svartri atvinnustarfsemi – enda fráleitt að verslun sem atvinnugrein sé notuð sem þvottastöð fyrir svarta hagkerfið. Það getur enginn talið eðlilega viðskiptahætti að koma í verslanir með úttroðin seðlaveski og versla fyrir milljónir, enda frábiður verslunin sér að aðstoða þá sem vilja komast hjá skattheimtu við að koma svörtum peningum í umferð. Við þurfum aðstoð löggjafans til að setja þak á greiðslur með reiðufé þannig að allar greiðslur yfir til dæmis 100.000 kr. fari fram með rafrænum hætti eða millifærslu.

Fyrir skömmu eignaðist verslunin bandamann í þessu máli þegar lögreglan kallaði eftir því hvort að taka ætti seðla úr umferð hér á landi til að sporna gegn skipulagðri glæpastarfsemi. Fyrsta skrefið mætti vera að taka stóru seðlana úr umferð, því það er auðvelt að kaupa vörur fyrir milljón og greiða með 10.000 króna seðlum, en það myndi enginn heilvita maður gera ef þá upphæð þyrfti að reiða fram með 1.000 króna seðlum.

Þrengjum að svarta hagkerfinu! Hættum meðvirkni með skattsvikum og gerum háar greiðslur með reiðufé tortryggilegar – enda yfirgnæfandi líkur á að rík innistæða sé fyrir þeirri tortryggni!