Ég veit ekki til þess að nokkur leikmaður í samfélaginu viti hvað það þýðir að telja eða endurtelja atkvæði til Alþingis. Og nú ætla ég að drepa ykkur. Lesið hægt og ekki fara! „Undirbúningsnefnd kjörbréfanefndar Alþingis hefur óskað eftir minnisblaði frá skrifstofu Alþingis varðandi stöðu nefndarinnar og heimildir hennar í rannsókn á talningu og meðhöndlun kjörgagna í Norðvesturkjördæmi,“ segir í frétt.

Enginn skilur rass í baun. Og auðvitað segir fólkið í heita pottinum: „Fokkitt, þetta kerfi virkaði hvort eð er aldrei.“

Stjórnmálasagan er þannig að kjördæmaskipting og þingmannafjöldi voru valin út frá hagsmunum fjórflokksins gamla. Áður en nýju flokkarnir sem hafa sveimað um eins og pirrandi fluga komu til sögunnar. Hinir stóru og sterku vilja ekki að flugurnar með einhverjum vitleysingum komist í nánd við Stjórnarráðið.

Geggjað lýðræði, ha? Við vitum ekkert hvað verður um þessa tíu þingmenn sem sitja í öngum sínum og hafa fórnað flestu til að komast á þing. Eru í Limbói. Fimm komust inn, og svo nei, úps!

Í fyrsta sinn efast almenningur alvarlega um framkvæmd kosninga. Þessi 80 prósent sem mættu á kjörstað.

Eftir að hafa verið í kosningaeftirliti í Tadsíkistan fyrir nokkrum árum hélt ég að við værum með allt á hreinu. Hið fullkomna lýðræði. Sennilega þarf maður alltaf að vera á verði. Eins og Spott­elín kisi minn segir: Aldrei að vanmeta aðstæður: Það geta alltaf nýir kettir komið í hverfið. Stay Tuned!