Þann 4. febrúar 2017 var ungri konu nauðgað af tveimur mönnum í kjallaraíbúð í Reykjavík. Mál hennar hefur enn ekki verið endanlega til lykta leitt af dómstólum. Rúmlega fjögur ár eru langur tími fyrir fórnarlamb nauðgunar, langur tími til að ná áttum eftir áfall og fóta sig á ný.

Þeir sem ekki átta sig á hvað fjögur ár eru langur tími, geta miðað við forsetatíð Donalds Trump en hann var nýtekinn við embætti forseta Bandaríkjanna þegar konunni var nauðgað. Líkamsleifar Birnu Brjánsdóttur voru nýfundnar og rannsókn stóð yfir á dauða hennar. Björt Ólafsdóttir var umhverfisráðherra og Þorgerður Katrín Gunnarsdóttir sjávarútvegsráðherra. Enn var um það bil hálft ár í að #metoo byltingin hæfist. Umræða um uppreist æru til handa kynferðisbrotamönnum hófst ekki fyrr en mörgum mánuðum eftir að konan var í kjallaranum með kvölurum sínum.

Á meðan konan hefur beðið eftir lyktum síns máls hafa morð verið framin, rannsökuð, upplýst og morðingjar sakfelldir, fíkniefniframleiðsla gerð upptæk og framleiðendum refsað. Heilt millidómstig hefur verið sett á laggirnar, dómarar þess skipaðir og Mannréttindadómstóll Evrópu kveðið upp áfellisdóm yfir því bæði í undirrétti og yfirdeild.

Og enn bíður konan eftir að nauðgarar hennar fái endanlegan dóm fyrir að nauðga henni í febrúar 2017. Málið var tekið til rannsóknar samdægurs og í dómi Landsréttar segir að eðlilegur gangur hafi verið í rannsókninni fram í miðjan maí. „Eftir það verður óútskýrt hlé á rannsóknaraðgerðum í um 10 mánuði,“ segir í dómi Landsréttar um málið. Rannsókn hafi svo verið tekin upp að nýju í mars 2018 og henni lokið í október sama ár. Ákæra var gefin út í maí 2019 og mennirnir dæmdir í þriggja ára fangelsi í nóvember það ár, heilum 33 mánuðum eftir að brotið var framið á konunni og rannsókn lögreglu hófst.

Fjórum árum eftir að konunni var nauðgað mildaði svo Landsréttur refsingu gerendanna um heilt ár vegna dráttar á rannsókn málsins og dæmdi þá í tveggja ára fangelsi.

Ríkissaksóknari var ekki sáttur við þessi málalok og óskaði eftir endurskoðun Hæstaréttar á þeirri mildi Landsréttar í nauðgunarmálum sem fræg er orðin. Hæstiréttur varð við þeirri beiðni og hefur boðað málflutning í málinu í næsta mánuði. Konan getur því átt von á endanlegum dómi í málinu í haust.

Saga þessarar konu er alls ekki óvenjuleg í reynsluheimi þeirra kvenna sem kæra kynferðisbrot. Saga hennar er saga allra kvenna. Hún er kvenkynssaga Íslands í hnotskurn. Konan getur aðeins þakkað fyrir að málið hennar fyrndist ekki á meðan lögreglan hafði öðrum hnöppum að hneppa.

En konur landsins gefast ekki upp þótt lögreglan sé á Onlyfans að leita að klámi og dómstólarnir á einhverju flippi sem enginn skilur. Þær hafa leitað til Mannréttindadómstóls Evrópu með harma sína og fengið þar áheyrn. Sú hreyfing sem nú er risin upp gegn þessu óréttlæti mun ekki lognast út af fyrr en brugðist verður við og ofbeldi gegn konum tekið alvarlega.