Konur þurfa bara að vera duglegri að gefa færi á sér í stjórnendastöður og grípa tækifærin. Þá náum við jafnrétti. Eða hvað?

Sumir halda því fram að á bak við konu í leiðtogahlutverki sé það raunverulega karl sem er við stjórnvölinn. Nærtækt dæmi er af farsælum forsætisráðherra, sem hefur verið sökuð um að leyfa karlkyns samráðherra að vera í hinu raunverulega bílstjórasæti ríkisstjórnarrútunnar. Voru Geir Haarde, Bjarni Ben. og Sigurður Ingi þá ekki við stýrið í forsætisráðuneytinu?

Aðrir kyngerva kvenkyns stjórnendur og taka þannig fókusinn af því sem þær hafa fram að færa. Nýlegt dæmi er að finna undir fyrirsögninni „Ótímabært sáðlát“, þar sem formaður stjórnmálaflokks er sögð hafa toppað of snemma. Hefði Logi Már Einarsson fengið sömu fyrirsögn?

Svo er hægt að segja að hún sé bara „erfið kona“. Eitraður stimpill sem dregur úr vægi alls sem hún hefur fram að færa. Týndust afrek Reynis Lyngdal og Baltasars Kormáks kannski undir fyrirsögnum af „erfiðum körlum“?

Gleymum ekki tímalausri klassík, að draga úr vægi þess sem þær hugsa og segja með því að gagnrýna útlitið. Vinsæll þáttastjórnandi sem gaf konum vettvang til að tjá sig um ofbeldi, er sett fram í líki tröllskessu á fjölskylduskemmtun. Það bætist við hótanir um ofbeldi. Var tröllkarlalíkneski af Gulla Helga nokkuð dregið í kringum bálköst á þrettándabrennu?

Allir ofantaldir karlar eru klárir og sniðugir – og ættu aldrei svona meðferð skilið. Gefum konum líka pláss til að vera klárar og sniðugar. Hægt er að gera betur.