„Ég þarf greinilega að knúsa þig meira,“ sagði maðurinn minn eftir að ég hélt ræðu um rannsóknargreinar sem ég hafði lesið. Þar kom fram að konur sem fá fleiri faðmlög frá maka sínum eru við betri heilsu. Þær eru ólíklegri til að veikjast af veirupest, hafa lægri blóðþrýsting, léttari lund, meiri orku og sofa betur.

Þarna stóð ég andspænis því að eftir tuttugu ára samband man ég ekki eftir að hafa beðið ástina mína um knús þegar ég þurfti mest á því að halda. Það var einfaldara að skríða inn í skel eymdarinnar. Að biðja um faðmlag var ekki hluti af minni lífsleikni. Allra heilla er vakning um mikilvægi faðmlaga smám saman að aukast.

Ástralinn Juan Mann er upphafsmaður herferðarinnar „Ókeypis faðmlag“. Hugmyndina fékk hann á flugvelli í Sydney þegar hann var að flytja heim frá London. Hann horfði á samferðamenn hlaupa í opinn faðm vina og ættingja og rann þá upp fyrir honum hve hann saknaði innilegs faðmlags, en hans fólk var allt brottflutt.

Juan útbjó skilti með orðunum „Free Hugs“ sem hann tók með sér á fjölfarna göngugötu, sem markaði upphaf að alþjóðlegum mánuði ókeypis faðmlaga sem er einmitt haldinn í þessum mánuði.

Knús ætti að vera jafn sjálfsagt og að drekka vatn því innileg snerting nærir lífsandann. Þegar við föðmumst framleiðir heilinn róandi efni sem senda líkamanum skilaboð um að við séum örugg.

Sagt hefur verið að fjögur faðmlög á dag sé leyndardómurinn á bak við hamingjusamt hjónaband, en sálmeðferðarfræðingurinn Virginia Satir segir að við þurfum helst fleiri. Kona veit nú að hún getur verið óhrædd við að segja við maka sinn „kona þarf knús“, því stundum er knús það sem hún sannarlega þarf.