Ekkert samband í lífi mínu hefur breyst jafn mikið með tímanum og samband mitt við jólin. Sem barn var ég að springa af tilhlökkun og gleði. Jólin voru sannarlega hápunktur ársins. Í dag er það samveran með fólkinu mínu sem mér þykir vænst um við jólin. En jólin eiga sér dekkri hlið sem eru endalaus markaðsskilaboð í aðdraganda þeirra. Skilaboð um að okkur vanti enn þá meira í ár en í fyrra og að eina leiðin til að sýna ást sé með dýrum gjöfum. Niðurstaðan verður oft streita, óþarfa vesen og ofneysla.

En verstur er óþarfinn. Allar þessar gjafir sem eru gefnar af því bara og enda eftir opnun í Sorpu eða ruslinu síðar. Allt eru þetta þættir sem hafa slæm áhrif á umhverfið, fjárhag okkar og eru afleiðing vel smurðrar markaðsvélar sem endurtekur í sífellu að það sem við höfum sé ekki nóg. Það er keyrð upp sturluð neysla á öllu þegar kemur að hátíð ljóss og friðar.

Þess vegna ættum við að prófa þessi jólin að gefa færri gjafir, gjafir sem við höfum ekki hugmynd um hvort viðkomandi muni einhvern tímann nota. Gefum frekar upplifanir, boðsmiða í leikhús eða gjafakort sem þiggjandinn getur þá ráðstafað að vild. Rannsóknir hafa líka sýnt að upplifanir færa okkur miklu meiri gleði og djúpstæðari minningar en eitthvert dót sem við fengum. Það að þú eyddir ekki hálfum degi í að finna rétta gjöf handa maka þínum þarf ekki að bera vott um kaldlyndi eða tilfinningadoða. Í stað þess að kaupa gjöf sem þú veist ekki hvort viðkomandi langar í skaltu skrifa einlægt og fallegt kort með. Slík nálgun eykur hagkvæmni jólanna, sparar mikinn tíma og er svo ljómandi góð fyrir umhverfið. Notaðu svo tímann sem sparast í að njóta.