Þrátt fyrir augljósa annmarka hefur mannkyninu tekist, í gegnum aldirnar, að koma sér upp mikilli þekkingu á óteljandi sviðum. Allar okkar ákvarðanir, allt sem við framkvæmum, byggir að meira leyti á þessari aldagömlu uppsöfnuðu þekkingu, sem færist á milli heila kynslóðanna.

Skáldið Einar Benediktsson sagði að orð væri á Íslandi til um allt sem er hugsað á jörðu. Að sama skapi má segja að Google geti fundið skrár um allt sem mannkynið hefur nokkurn tímann hugsað – að samansafn heila genginna kynslóða sé einfaldlega hægt að gúgla. Gervigreind er tilraun sem er innblásin af því hvernig heili okkar starfar, tölvukerfi með getu til að taka ákvarðanir og framkvæma fjölda þess sem áður krafðist mannlegrar greindar. Hún á það sameiginlegt með heila mannsins að það er ekki til einfalt svar við því hvað gervigreind er og hvar takmörk hennar liggja.

Gervigreind flokkar heiminn niður í hólf en flokkunin er langt í frá hlutlæg. Ef gervigreind er til dæmis notuð til að skanna andlit umsækjenda um störf, í því skyni að sía þau sem eru ótraustvekjandi í burtu, er hætt við því að mat gervigreindar á því hvers konar andlitsfall er traustvekjandi verði hlaðið fordómum. Gervigreind býður upp á endalausa möguleika, en hún hefur ekki siðferðisvitund. Hún getur því fest alla okkar hvimleiðu fordóma enn frekar í sessi og staðfest stigveldin sem við höfum unnið gegn öldum saman. Gervigreind tekur ekki endilega bestu ákvarðanir allra mögulegra ákvarðana. Ekki frekar en heili mannsins. En gervigreind mun opna okkur tækifæri sem okkar villtustu hugmyndir sjá ekki fyrir, eins og tölvur og snjallsímar gerðu. Við skulum reyna að nýta þau til hagsbóta fyrir mannkynið.