Villukastljós

Útvarp Saga hefur margt sér til ágætis og mikið er til í slagorðinu um að hún þori á meðan aðrir þegja þar sem það er vissulega nokkuð vogað að bjóða upp á skýrslur um gang heimsmála frá sjálfsagt hispurslausasta fréttaritara íslenskrar fjölmiðlasögu, Guðmundi Franklín Jónssyni. Gúndi, eins og véfréttaritarinn frá Borgundarhólmi er kallaður, varpar reglulega villuljósi á heimsmálin af aðdáunarverðum sannfæringarkrafti og mikið látið með að hann segi fréttir sem aðrir fjölmiðlar þegja um.

Frábær náungi

Skörunin við „meginstraums­miðlana“ liggur kannski í því að Donald Trump er mælikvarði allra hluta hjá Gúnda sem byggir „skúbbin“ oft á upploginni þvælu úr vafasömum skúmaskotum netsins. Þannig er honum tíðrætt um að Bill og Hillary Clinton séu, ásamt flestum nafntoguðum andstæðingum forsetans, virk í barnaklámshring Jeffreys Epstein. Trump er víst á leiðinni að uppræta perraklíkuna þótt hann hafi lýst yfirperranum svona 2002: „Ég hef þekkt Jeff í fimmtán ár. Frábær náungi. Það er ofboðslega gaman að vera með honum og það hefur meira að segja verið sagt að hann kunni jafn vel að meta fagrar konur og ég. Og margar þeirra eru í yngri kantinum.“ Gömul falsfrétt?