Seinagangur stoðdeildar

Mál albönsku fjölskyldunnar sem vísað var úr landi vakti mikla athygli. Það kemur ekki á óvart enda framkvæmdin ómanneskjuleg. Samkvæmt Útlendingastofnun sótti fjölskyldan um alþjóðlega vernd í upphafi október og um tvær vikur tók að synja þeirri beiðni. Þá tók stoðdeild lögreglunnar, sem sér um að flytja fólkið úr landi, við. Fyrst ekki kom til greina að leyfa fjölskyldunni að dvelja hér fram yfir fæðingu hlýtur að vera ámælisvert að framkvæmd brottvísunarinnar hafi ekki verið sett í forgang. Varla tekur þrjár vikur að skipuleggja slíka aðgerð.

Versta starf landsins

Starfsfólk Útlendingastofnunar þarf að framfylgja afar harðneskjulegum lögum landsins. Til þeirra er gerð sú krafa að þau láti hjartað ráða för. Það er auðvitað fráleitt. Reiðin á að beinast gegn löggjafanum en ekki þeim sem eru í þeirri stöðu að framfylgja þeim. Forstjórinn stóð sig ágætlega í að svara fyrir erfitt mál í Kastljósi í vikunni, vitandi að hann yrði úthrópað ómenni eftir þáttinn. Helst hefði hann kannski átt að sleppa því að segja að hann gæti ekki sett sig í spor fjölskyldunnar, það var kannski fullmikið. Að öðru leyti var hann ágætlega rökfastur við að verja versta starf landsins sem hann sinnir.