Glóbalistasamsærið

Pétur Gunnlaugsson reisti í vikunni Útvarpi Sögu veglega vörðu á krákustígum stöðvarinnar um íslenskt fjölmiðlalandslag með tímamótaviðtali við sagnfróðan Hall Hallsson. Þeir félagar flettu ofan af alheimssamsæri djúpríkra sósíalista-glóbalista sem hafa víst tekið yfir RÚV, Sjálfstæðisflokkinn og Evrópusambandið til þess að drepa lítil börn og gera Ísland að hjálendu. Lygilegra en nokkur skáldskapur, hlýtur þetta að vera sannleikurinn þannig að nú ríður á að losa RÚV úr hálstaki Sorosar og ryðja Gísla Marteini og vinum hans úr Vesturbænum út svo Hallur og Pétur fái sinn verðskuldaða sess í sjónvarpinu á föstudagskvöldum.

Grænmetispressan

Tími Leðurblökumannsins er liðinn þar sem fram er komin ofurhetjan Kálmann, sem Arnmundur Ernst Backman leikur. Kempan hefur skorað á sjálfan Kjötmann í sjómann, en sá er oddviti Sjálfstæðisflokksins í Reykjavík í hjáverkum. Tilgangurinn er að fá úr því skorið hvora hetjuna börnin elska meira. Kjötmann telur sjómann ekki besta mælikvarðann á styrk og stingur upp á fótapressu. Þessa pattstöðu má þó auðveldlega leysa með því að benda þeim á að nýbúið er að opna bardagapytt við Tryggvagötu.