Framsókn er besta vörnin

Þynnka Miðflokksmanna eftir djammið á Klaustri reyndist að lokum heldur meinlaus enda hafa organdi partíljón Miðflokksins með frumlegri krísustjórnun sýnt fram á gagnsleysi 12 sporanna sem margur alkinn hefur notað til þess að fikra sig frá drykkjulátum og dólgshætti. Þveröfugt á þá gömlu alkapælingu slepptu þeir iðruninni og ruddust hrokafullir í árásarham úr skammarkróknum. Grasrót Framsóknarflokksins slóst þá með þeim í sigurgöngu en gamli móðurflokkurinn situr uppi með höfuðverkinn á meðan „klofningsbrotið“ blæs út eins og púki á framsóknarfjósbitanum.

Dagskrárvald ofbeldismanna

Ríkisstjórnin átti sinn þátt í upprisunni með því að rúlla út rauða dreglinum fyrir Miðflokksmenn og gefa þeim eftir hið eftirsótta dagskrárvald. Þvert gegn óskum vinsælasta ráðherra stjórnarinnar, sem fékk nokkrar gusur yfir sig þegar stórkarlaleikarnir stóðu sem hæst á Klaustri. Enda láta þeir sér í léttu rúmi liggja hvaða nöfnum Lilja kallar þá og engum þeirra hefur dottið í hug að kvarta undan orðum hennar um ofbeldismenn til siðanefndar um tjáningu þingkvenna, þar sem þeir og aðrir þingkarlar eiga öruggt athvarf fyrir eitruðum stjórnmálakonum.