Einhvern veginn tókst þeim sem iðulega hafa rangt fyrir sér þegar þeir stinga niður penna, að vera samir við sig þegar kom að skrifum um nýlega auglýsingu Íslandsstofu til að laða ferðamenn til landsins.

Auglýsingin, sem var tveggja vikna átaksverkefni, er vel heppnuð. Hún fangar vel tilfinningu fjölda fólks um heim allan, sem hefur verið lokað inni, nánast eins og glæpamenn, svo mánuðum skiptir, vegna aðgerða stjórnvalda til að bregðast við COVID-19. Fjöldi fólks mátti rétt skreppa út úr húsi til að kaupa í matinn, annars varð það að dúsa heima.

Maðurinn er félagsvera og þarf að valsa um og hitta fólk. Spjall í gegnum netið dugar ekki til, þótt það sé ágætis sárabót. Höfundar auglýsingarinnar voru einmitt í þessum sporum, fastir heima við og þurftu á Íslandi að halda, svo vitnað sé í herferðina.

Til að bæta gráu ofan á svart fyrir heilmargar fjölskyldur eru ung börn að fara yfir um af eilífri inniveru og taumlausu sjónvarpsglápi og tölvuleikjaspilun. Flestar íbúðir í stórborgum eru litlar og treysta íbúarnir á lystigarða og kaffihús því það er ekki garður við húsin. Víða eykur sumarhitinn á óþægindin.

Að sjálfsögðu líður flestum illa við þessar aðstæður. Og dauðlangar til að öskra, flækjast um víðerni og finna sálarró, þótt það væri ekki nema í skamman tíma. Auglýsingin talar inn í þennan veruleika.

Hljóðstyrk hátalaranna sem hleyptu öskrunum til okkar var stillt í hóf. Þess vegna fylgdi garginu ekki hljóðmengun og þeir sem kvarta yfir sjónmengun taka sig of hátíðlega. Þetta voru einungis tveir litlir kassar á fáeinum stöðum. Þetta er skemmtileg auglýsing. Erlendir fjölmiðlar virðast vera á sama máli og hafa birt yfir 800 greinar um markaðsátakið.

Það er merkilegt hve margir gagnrýnendur auglýsingarinnar gátu ekki sett sig í fótspor margra annarra Vesturlandabúa. Það tók þó steininn úr þegar Guðmundur Andri Thorsson, þingmaður Samfylkingarinnar og eindreginn Evrópusambandssinni, sagði að auglýsingin hefði verið svo illa heppnuð því auglýsingastofan hefði lítil tengsl við Ísland. Alþjóðasinninn gerðist þjóðernishyggjumaður á augabragði … vegna auglýsingar sem hitti í mark. Merkilegt að hann skuli treysta útlendingum fyrir lagasetningu hérlendis en ekki til að semja auglýsingar um landið.

Við Íslendingar erum heppnir. Hér er gott að búa og ferðatakmarkanir hafa verið minni en víða annars staðar. Lélegt að láta lítils háttar óp lengst frá mannabyggðum slá sig út af laginu.