Stundum er ágætt að staldra við ef maður finnur ónotatilfinningu ágerast í maganum. Þá getur verið gott að skoða aðstæður í umhverfinu og reyna að skilja hvað er í gangi. Sjálfur tel ég mig hafa séð nokkur óveðursský á himni.

Fasteignaverð hefur aldrei verið hærra. Allt selst og eftirspurnin er óseðjandi. Byggingakranar eru úti um allt höfuðborgarsvæðið, alls staðar er verið að byggja. Fjárfestir sem ég þekki sagði mér að allir í golfklúbbnum hans væru meira og minna að byggja blokkir. Verðbólga er farin að valda vandræðum og vextir fara hækkandi og munu hækka enn frekar. Almenningur sem hefur fjármagnað íbúðakaup sín með óverðtryggðum lánum mun finna að slíkar vaxtahækkanir hafa hratt mikil áhrif.

Sala á bílum með bílalánum hefur sjaldan verið meiri. Olíuverð er komið í svipaðar hæðir og árið 2008. Reynslan sýnir að þegar olíuverð er svo hátt hefur það slæm áhrif á heimshagkerfið og kreppa fylgir í kjölfarið. Bílastæðin við Leifsstöð eru yfirfull og kreditkortaeyðsla Íslendinga erlendis hefur aldrei verið meiri. Hlutabréfamarkaður hér á landi hefur vaxið gríðarlega eftir ævintýralega ávöxtun þó nú sé farið að hökta. Komur fólks á Vog með kókaínfíkn hafa aldrei verið fleiri. Allt eru þetta kunnuleg stef sem minna á Ísland fyrir 15 árum.

Árið 2007 hefur oft verið nefnt sem táknmynd veislunnar sem endaði með hruni. Verkefnið núna er að tryggja að ársins 2022 verði ekki minnst með sama hætti og við getum vel leyft okkur bjartsýni. Hagkerfi okkar stendur á traustum grunni og enginn hefur enn borðað gull. Þegar haustar safnar bóndi forða fyrir veturinn. Það eigum við líka að gera og muna að á eftir vetri kemur alltaf vor.