Ég skrifaði pistil hér fyrir ca. ári um að leiðinlegasta árstíðin væri haustið sem er einmitt sú árstíð sem er að ganga í garð. Ef fram fer sem horfir þá þurfum við þó ekki að kvíða haustinu því það er löngu komið, allavega hingað á Suðvestur­hornið.

Vissulega geta íbúar á Norður - og Austurlandi glaðst yfir góðu veðri en það er undantekning frekar en regla. Eins sorglegt og sólarleysið hefur verið fyrir okkur sem hér búum þá er þessi samruni sumars og hausts kannski það sem lýsir íslensku veðri best.

Samkvæmt upplýsingum frá Veðurstofu Íslands er meðalhiti í Reykjavík á bilinu 0-10°C yfir árið. Þetta er vandamálið, það eru nánast engin skil á milli árstíða. Vissulega blæs, frýs og rignir inn á milli en hitastigið sveiflast sáralítið sé miðað við meðalhita. Þess vegna er enginn munur á íslensku sumri, vori eða hausti.

Niðurstaðan eða meðalveðrið verður alltaf einhvers konar grátt haust þar sem sjaldan sést til sólar.Það er kannski helst veturinn með sinn snjó og kulda sem nær að skera sig úr. Samt er það þó þannig að áðurnefndur meðalhiti bræðir reglulega allan snjó, þannig að til dæmis kaup á árskorti í Bláfjöll er happdrætti.

Veðurstofa Íslands er sökum þessa oft boðberi leiðinlegra frétta og ég ætla ekki að skjóta sendiboðann. Hins vegar mætti þessi ágæta stofnun taka sig til og bjóða okkur upp á veðurspár sem við getum skoðað til dæmis í farsíma. Norska veðurstofan er til dæmis með fína lausn þar sem hægt er að skoða veðurspár næstu daga í appi.

Best væri samt að vera laus við allar norskar veðurspár, því í Noregi virðist alltaf vera gott veður. En höldum jákvæðninni, þetta gæti líka verið svo miklu verra.