Hið sáraeinfalda spil Domm var kynnt fyrir almenningi í þáttum Fóstbræðra á sínum tíma.
„Sá sem fær hjartagosa eða gosa af gagnstæðri sort, hann gefur allan sinn spaða undir tíu, svo framarlega sem summa spaðans sé hærri en tveir hæstu tíglarnir – eða segir pass, en þá verður hann líka að draga lauf,“ voru leikreglurnar útskýrðar fyrir pari sem var í kvöldverðarboði hjá vinafólki.
Mörgum þykir engu líkara en að höfundar Domm hafi samið nýjar reglur um sóttkví sem tóku gildi aðfaranótt miðvikudags.
Gúllas
Í handboltanum í Ungverjalandi er staðan jafnvel enn flóknari en íslensku sóttvarnareglurnar. Tekist er á um fjögur sæti í undanúrslitum og um leið öruggan farmiða fyrir þrjár þjóðir á heimsmeistaramót, sem haldið verður á næsta ári.
Þannig færu liðin sem vinna gull, silfur og brons beint inn í næstu úrslitakeppni, án þess að þurfa að ómaka sig við spileríi í undanriðlum.
Nema náttúrlega að þjóðirnar í fyrsta til þriðja sæti núna séu annað hvort ríkjandi heimsmeistarar eða gestgjafar á væntanlegu heimsmeistaramóti.
Þá leika liðin sem enda í fjórða og fimmta sæti á Evrópumeistaramóti núna, á HM að ári. Nema þau séu með Covid, auðvitað.
Þá gilda nýju sóttvarnareglurnar.
