Umtalsverð fjölgun hefur orðið á félagslegu leiguhúsnæði síðustu árin. Þrátt fyrir fjölgun íbúða hefur kerfinu ekki tekist að saxa á biðlistana, en meðalfjöldi umsókna í bið eftir félagslegu húsnæði hefur haldist í kringum 850 síðustu sex árin.

Heimatilbúinn vandi

Eitt af grunnhlutverkum hvers sveitarfélags er að tryggja nægilegt magn af byggingalóðum fyrir íbúðarhúsnæði á hagstæðu verði. Reykjavíkurborg hefur mistekist þetta og sýnir þessi fjölmenni biðlisti þá gríðarlegu eftirspurn sem er eftir ódýru húsnæði í höfuðborginni.

Í þeirri viðleitni að stytta biðlista hefur borgin keypt upp mikið magn húsnæðis af frjálsum markaði, en það hefur aukið vandann enn frekar. Félagsbústaðir eiga nú tæplega 2.000 almennar íbúðir en síðustu ár hafa verið keypt hundruð íbúða af frjálsum fasteignamarkaði, en einungis fimm íbúðir voru byggðar allt síðasta kjörtímabil sérstaklega fyrir Félagsbústaði. Afleiðingin er augljós, minna framboð er af ódýrum íbúðum til sölu á almennum markaði. Hefur þetta fyrirkomulag Félagsbústaða leitt til þess að tekjulágir einstaklingar neyðast til þess að sækja um félagslegt húsnæði í stað þess að geta keypt sitt eigið.

Fátæktargildra

Tölur sýna að á síðustu tíu árum hafa rúmlega 20 leigjendur, eða einungis um 1% þeirra, komist úr félagslega kerfinu á ári. Félagslega kerfið er þannig byggt upp að fólk festist í því og á raunar litla sem engan möguleika á að komast út á almennan markaðinn. Eigna- og tekjumörk eru svo lág að einstaklingar sem hyggjast komast út úr kerfinu mega ekki vera með hærri mánaðarlaun en 445.000 kr. og sambúðarfólk samtals 624.000 kr. á mánuði og eignir þeirra mega ekki vera hærri en 5,8 milljónir. Það þýðir að fólk getur ekki safnað sér fyrir útborgun í íbúð og leigt félagslegt húsnæði á sama tíma.

Meðal atriða sem koma leigjendum þannig í hættu á að missa íbúðina sína eru til dæmis launahækkanir, eignamyndun og nýr maki. Enginn ætti að þurfa að búa við slíkar aðstæður. Myndu Félagsbústaðir til dæmis bjóða upp á þann möguleika að fólk gæti eignast íbúðirnar sem það býr í myndi það virka sem stökkpallur aftur út í lífið og úr viðjum kerfisins.

Sjálfstæðisflokkurinn í borginni leggur áherslu á að félagslega kerfið sé byggt þannig upp að það grípi fólk í neyð en hjálpi því aftur út í lífið um leið og tækifærin gefast. Hjálpum fólki til sjálfshjálpar.